РУСКИ КЕРЕСТУР – Од штредку прешлого тижня, кеди спаднул перши тогорочни шнїг, Керестурци ше поносую на нєдостаточно очисцени драги по валалских улїцох. Шнїг, хтори нападал и познєйше, на векшини драгох нє розгарнути на час, так же транспорт очежани, аж и за пешакох, пре вигладкани, змарзнути и шлїзки драги. Як у цалей кулскей општини, и у Руским Керестуре шнїг би мало розгартац подприємство „Молиментум” з Кули, на основи достатей роботи на тендеру хтори розписала Општина Кула.
У складзе зоз своїма капацитетами, у чисценю од шнїгу помага и Явне комуналне подприємство (ЯКП) „Руском”, а як за „Рутенпрес” гварел його директор Иґор Фейди, „Молиментум” ма розгартац шнїг на главней улїци – на Маршала Тита, та на Русинскей, Фрушкогорскей, Владимира Назора, Партизанскей и Иву Лоли Рибара, а на менших улїцох „Руском”.
Керестурске ЯКП задлужене за отримованє явних поверхносцох, цо подрозумює и одметанє шнїгу на паркинґох, на пияцу, коло каплїци, як и коло явних установох и подприємствох, та на дражкох у центре и парку. Директор „Рускому” Иґор Фейди за Рутенпрес гварел же вчера, кед роботнїки вишли на терен, дзепоєдни паркинґи уж були позаберани, та шнїг на нїх нє могол буц цалком порозгартани, а вчера пополадню ище нє були поодметани и дражки у центре.
Роботнїки „Рускому” сипали и соль на дражки, медзитим, пре моцни минус, соль нє могла реаґовац, гварел Фейди, а понеже за нєшка наявена дакус благша жима, будзе ше ю сипац ознова.
Опрез предавальньох, киоскох, Здравственей амбуланти, Пошти, Месней канцелариї, дзецинскей заградки и других установох у центре поодметане, алє нє и опрез погосцительних обєктох, а опрез хижох у валалє дражки векшином поодметани.