РУСКИ КЕРЕСТУР – Вчера вечар, у Ресторану ,,Червена ружаˮ, отримана схадзка членох Здруженя паприґарох ,,Капсикум анумˮ, представена дїялносц Задруґи ,,Керестурска паприґаˮ и потолковани розлики у одношеню на Здруженє.
Предсидателька Здруженя и директорка Задруґи Душица Орос привитала шицких присутних, и розтолковала розлику медзи Задруґу и Здруженьом и їх дїялносцами.
– Здруженє будзе орґанизовац манифестациї, едукативни путованя и презентациї. Членарина ше будзе плациц и надалєй, за 2018. рок будземе ю наплацовац у януару и фебруару, а одкуп и предаванє репроматериялу будзе окончовац Задруґа, цо нє могло окончовац Здруженє – гварела Оросова.
Предсидатель Управного одбору Задруґи Владимир Варґа представел можлївосци за конкурованє на вецей кредитни линиї котри субвенционує Општина Кула, покраїна и република. Бешедоване и о субвенцийох за наступну сезону, а дзелєни и потребни формулари и список потребних документох за конкурованє.
Новооснована Задруґа представела успих после першей одкупней сезони, а наглашене же праве вона реґуловала и отримовала релативно добру цену, та же их и други одкупйоваче провадзели.
– Задруґа оформена з минималним числом членох, алє вона будзе на хасен шицким парастом. Од 1. януара будземе мац власну польопривредну апатику, терашню ,,Юарбисˮ, з конкурентнєйшим репроматериялом. Будземе и поштреднїки у осиґураню паприґи, та обчекуєме конкурентнєйши и нїзши цени у односу на тарґовищни – гварел Варґа.
