Заменїца шефа Делеґациї ЕУ у Сербиї нащивела општину Шид

автор влдї
912 Опатрене

ШИД – Матея Норчич Штамцар, заменїца шефа Делеґациї Европскей униї (ЕУ) у Републики Сербиї вчера, 14. мая, нащивела општину Шид.

Вєдно зоз представнїками Орґанизациї Зєдинєних нацийох за розвой (УНДП), Комесарияту за вибеженцох и миґрациї, Министерства здравя и локалней самоуправи, нащивели Прилапююци центер за миґрантох „Адашевци”.

Заменїца шефа Делеґациї ЕУ у Сербиї мала и схадзку зоз предсидательом Општини Предраґом Вуковичом и його сотруднїками.

После того нащивели Основну школу „Бранко Радичевич” у Шидзе дзе ЕУ донирала инсталованє ошвиценя коло будинка Школи односно школского двора, а до хторей ходза школяре миґранти зоз Прилапююцого центра „Принциповец”.

Под час нащиви општини Шид, нащивени и Дом здравя дзе Матея Норчич Штамцар придала ключи комби превозки директорови Дома здравя др Крстови Курешови, хтори донация ЕУ, а будзе хаснована за транспорт пациєнтох миґрантох, як и домашнїх пациєнтох на диялизу до Сримскей Митровици, як и за други потреби транспорту пациєнтох до здравствених установох звонка Шиду.

ЕУ тиж обезпечела и плаци за двох вожачох за спомнуту комби превозку.

На концу нащивена Основна школа „Вук Караджич” у Адашевцох до хторей ходза и школяре миґранти зоз Прилапююцого центру „Адашевци”. У школи отримана роботна акция ушореня єдного кабинета после хторей родичи школярох миґрантох порихтали закуску з традицийнима єдлами зоз Авґанистану и Ирану, а домашнї родичи єдла зоз Сриму.

ПОВЯЗАНИ ТЕКСТИ