За активносци националних совитох 60 милиони динари

автор ядю, фото апв
1.2k Опатрене

НОВИ САД – Предсидатель Покраїнскей влади Иґор Мирович нєшка уручел контракти з хторима обезпечени 60,1 милиони динари за финансованє активносцох 15 националних совитох националних меншинох хтори маю реґистроване шедзиско на териториї Войводини.

За финансованє порядней дїялносци националних совитох у 2018. року видвоєни 47,1 милиони динари, док 13 милиони динари опредзелєни за розвой дїялносци.

Предсидатель Мирович наглашел же, кед ше бешедує о националних меншинох, вец то бешеда о шицких нас, о Войводини и Сербиї, о заєднїцтве и заєднїцких проблемох и намаганьох же би ше их ришело.

Мирович визначел же у 2018. року по конкурсу за потримовку активносцом националних совитох средства звекшани за пейц одсто, и виражел прешвеченє же у наиходзацим периодзе тоти видвойованя буду ище векши.

Подпредсидатель Покраїнскей влади и покраїнски секретар за образованє, предписаня, управу и национални меншини-национални заєднїци Михаль Нїлаш наглашел же вецейрочна пракса додзельованя средствох за активносци националних совитох потвердзенє пошвеценосци Покраїнскей влади очуваню и унапредзеню положеня националних заєднїцох у Войводини.

-Потвердзенє того становиска и закладанє ресорного секретарияту за промоцию и унапредзенє меншинских правох прейґ вельочислених рочних конкурсох, як и активного участвованя у провадзеню и имплементациї Акцийного плану за витворйованє правох националних меншинох, односно участвованя у поступку приношеня вименкох и дополнєньох законох хтори од окремного значеня за корпус меншинских правох, визначел Нїлаш.

Средства додзелєни националним совитом мадярскей, словацкей, горватскей, румунскей, рускей, ромскей, чарногорскей, бунєвацкей, македонскей, українскей, нємецкей, ческей, єгипетскей, ашкалийскей и греческей националней меншини.

21032018_Mirovic i Njilas, dodela ugovora-4

ПОВЯЗАНИ ТЕКСТИ