РУСКИ КЕРЕСТУР – Виберанки за нове зволанє членох Совиту Месней заєднїци Руски Керестур розписани 6. юния, а 8. юлия ше будзе гласац за нових єденац членох Совиту котри ше можу кандидовац по 22. юний.
За тераз кандидатуру поднєсла лїстина „Прето же любиме Руски Керестур” на котрей ше находза єденацецеро кандидати – Славко Бучко (поднїматель), Илонка Зарубица (спортски тренер), Тихомир Медич (поднїматель), Златана Надь (специялиста общей медицини), Владо Олеяр (информатичар), Желько Папуґа (польопривреднїк), Михайло Пашо (поднїматель), Марина Преґун (фахови воспитач), Дюра Сабадош (польопривреднїк), Єлена Сивч (професор ґеоґрафиї) и Михайло Фейди (професор математики у пензиї).
Шицки полнолїтни гражданє Руского Керестура з нагоди наиходзацих виберанкох можу превериц чи су уписани до виберацкого списку, або поднєсц вимогу за пременку податкох у истим по 22. юний, од 7 по 15 годзин у будинку Општини Кула, як и електронски на официйним интернет боку Министерства державней управи и локалней самоуправи https://birackispisak.mduls.gov.rs/javniportal.
Заключно зоз 22. юнийом по 24 годзин мож поднєсц и кандидатуру за наступни виберанки, а єдно спомедзи условийох за преглашенє кандидата же би назберал 30 оверени подписи жительох Керестура як потримовку.