НОРТ БАТЛФОРД (КАНАДА) – Члени Саскачеванского дружтва рускей култури мали вецей активносци у авґусту. Участвовали на вецей манифестацийох на хторих рихтали єдла а 15. и 16. авґуста орґанизовали и штварти Млади руски камп.
У авґусту, 15. и 16. авґуста орґанизовани 4. Млади руски камп. На кампу участвовали млади члени Саскачеванского дружтва рускей култури зоз своїма фамелиями и приятелями, медзи котрима були дзепоєдни тиж приселєнци зоз Африки, України, Русиї, Кини, Чилеа и Сербиї. Час препровадзовали у спортских бавискох, а зоз музику и франту коло огня, док ше нє упекло праше, остали до вщасного рана, а вец ше розишли ютре дзень коло поладня.
На тогорочних традицийних Дньох териториї сиверозаходу, хтори ше отримує у Норт Батлфорду каждого року од 12. по 14. авґуст, ше зишли числени фамелиї и приятелє. Попри забавних змистох и атракцийох ту вше и вельке понуканє єдзеня и лакоткох. Члени Руского дружтва, як и роками пред тим, пририхтали и предавали єдла у своєй бутки, а власни труд и час до тей волонтерскей роботи уложели коло 20 члени дружтва.
Потим, 22. авґуста, у Норт Батлфорду отримане и змаганє у збиваню зоз демолованима автами Demolition derby, на хторим члени Саскачеванского дружтва рускей култури ознова були присутни зоз предаваньом єдлох. Була то и нагода представиц ше штредку, бо на таки збуваня вше придзе вельо людзох. Заробело ше и одредзени средства, хтори ше вєдно з донациями, похаснує за отримованє уж традицийного Руского пикнику, дочеку Нового року и за други активносци Руского дружтва.
