Збера ше средства за закрице на будинку при Водицовей церквочки

автор мст
968 Опатрене

РУСКИ КЕРЕСТУР – Керестурска парохия св. оца Миколая почала зберац средства за закрице на будинку при церквочки у Водици. Як виявел керестурски парох о. Михайло Малацко, прейґ проєктох од держави ше уж достало 300 000 динари, алє то нє достаточно.

– Будинок релативно нови обєкт, алє на нїм положени стари черепи, та уж досц давно премака – гварел о. Малацко. – Потребне нє лєм заменїц черепи, алє и обновиц закрице по нєшкайших стандардох же би було добре защицене, з одвитуюцу подлогу. Потребни ище додатни средства, та поволуєме вирних хто може и жада же би помогнул. Сподзиваме ше же, як и вше потераз, з помоцу Божу назбераме достаточно средства.

Дзепоєдни вирни ше уж и одволали и подаровали 1 000 швайцарски франки и 240 евра. Иншак, тот будинок ма велї намени – то и сахристия, и место за духовни стретнуца, ту и кухня и просториї за спанє. У плану же би ше и тоти просториї у наиходзацих рокох реновирали и преправели  же би були функционални.

Роботи на замени закрица ше планую за даскельо тижнї, а окончовали би их углавним добродзечно домашнї майстрове и шицки хтори жадаю помогнуц.

ПОВЯЗАНИ ТЕКСТИ