З премиєру РНТ нєшка почина Драмски мемориял

автор зам
939 Опатрене

РУСКИ КЕРЕСТУР – З премиєрним виведзеньом представи „Зазбероваче труплох” Звонимира Павловича, у режиї Михайла Зазуляка и Славка Ороса, а у виводзеню нашого националного Руского народного театру „Петро Ризнич Дядя”, нєшка на вечар у Руским Керестуре почина 49. Драмски мемориял Петра Ризнича Дядї.

1-Memorijal-02

Початок представи 19,30 годзин, а источашнє то будзе и перше виводзенє того нового Павловичового тексту, хтори бешедує о остатнїх дзешец рокох живота др Гавриїла Костельника (од 1938. по 1948. рок), з чим ше РНТ уключел до прешлорочного означованя 130-рочнїци народзеня велїкана нашей литератури и язика.

Пред шветочним отвераньом и першу представу, у рамикох Мемориялу на 19 годзин у голу Дому култури будзе отворена вистава подобових роботох у енкаустики Сонї Папуґа Андєлич.

Драмски мемориял тирва по 26. марец, шицки осем представи (за старших и дзецински) буду виведзени у Велькей сали Дому култури, представи за дзеци починаю на 12,30, а за старших на 19,30 годзин.

Перши викенд на Мемориялє будзе вивезена лєм спомнута представа РНТ, а у тижню, буду одбавени три дзецински представи – на вовторок, 21. марца представа Руского КУД „Др „Гавриїл Костельник” з Кули „Приповедки з Коцко-городу” КЦ „ЦЕКОМ”, у режиї Нади Лендєр; на стреду, 22. марца госцуюца представа (по українски) КУД „Иван Сенюк” з Кули „Чаривни персцень” К. Перелїсни, у режиї Петра Курмана; а на штварток и пияток, 23. и 24. марца, представа Драмского студия „АРТ” керестурского Дому култури „Перша Журка” Т. Николетича, у режиї Ксениї Бодянец.

Представа Керестурцох будзе бавена два раз, понеже ю приду патриц и школяре з наших местох, у орґанизациї Одбору за образованє Националного совиту Руснацох, а часц школярох з наших местох придзе патриц и представу Кулянцох.

Виводзенє представох за старших на Мемориялє будзе предлужене од штвартку, 23. марца, кеди госцую драмски аматере з КУД „Яким Гарди” з Петровцох, з Горватскей, з представу „Державни крадош” Ф. Хаджича, у режиї Томислава Раца, а на пияток, 24. марца з младежску представу „Бонґ-Боинґ” М. Камолетия, у режиї Владимира Надя Ачима, наступя домашнї з Драмского студия „АРТ” керестурского Дому култури.

На соботу, 25. марца, на Мемориялє госцує ансамбл з иножемства, зоз Словацкей –  „Театер при фонтани” з Михаловцох, хтори по „виходнярски” одбави комедию „Жимне вре” Катарини Вареховей, у режиї Гелени Андреєвей и Єли Тимковей, а Мемориял на нєдзелю, 26. марца завре уж на фестивалох наградзована представа по сербски – „Малогражданска свадзба” Б. Брехта, у режиї Радоя Чупича, а у виводзеню Театру „Стеван Сремац” з Червинки.

Драмски мемориял Петра Ризнича Дядї ше отримує з финансийну потримовку Министерства култури и информованя Републики Сербиї, Покраїнского секретарияту за културу, явне информованє и одношеня з вирскима заєднїцами, Покраїнского секретарияту за образованє, предписаня, управу и национални меншини-национални заєднїци, Општини Кула и Националного совиту Руснацох.

ПОВЯЗАНИ ТЕКСТИ