Коцурски парасти ше стретли зоз чолнима людзми Покраїнского секретарияту за польопривреду, водопривреду и лєсарство, а стретнуце орґанизовало коцурске здруженє „Бачки малинаре”. Найвецей ше бешедовало о конкурсох, кредитох, укладаньох до польопривреди и державней потримовки у купованю машинох и тракторох.
На стретнуцу зоз фаховцами зоз Покраїнского секретарияту, вовторок, 18. априла, нашо парасти дознали новосци о помоци держави у польопривреди и яки новосци и нови мири компетентни секретарият запровадзує.
Покраїнски секретар за польопривреду, водопривреду и лєсарство мр Вук Радоєвич присутним гварел же за польопривреду обезпечене 70 одсто вецей средства як цо то було потераз.
Радоєвич тиж так потолковал же на котри способ мож достац врацанє средствох, алє и спозорел же кед на даяким конкурсу пише же держава враци и до 50 одсто средствох, то нє муши значиц же будзе 50 одсто, алє же може буц и 30 одсто, и 40 одсто.
Потим, парастох упознал з тим же яки мири потримовки за статкарство и як дойсц до нових погонских и приключних машинох.
Понеже на схадзки було польопривреднїкох котри ше занїмаю и зоз продукцию малинох, польодїлством, алє и тих котри ше сцу упущиц до польопривреди, та и питаня за Покраїнского секретара були розлични. Парастох найвецей интересовали информациї о державней потримовки за купованє нових тракторох и приключних машинох.
МЛАДИХ ИНТЕРЕСУЮ „СТАРТ-АП” КРЕДИТИ
З другого боку, малинарох интересовало же яку потримовку держава дава за правенє хладзальнї, понеже коцурске здруженє малинарох шлїдуюцого року ма у плану прейсц до задруґи и направиц свою хладзальню, та дознали же Покраїна видвоєла штири раз вецей динари як потераз за опрему хладзальньох и сушарньох и же по трох основох можу буц врацени средства и до 11 милиони динари.
Младих котри були на схадзки, а потераз нє мали ґаздовство, найвецей интересовало же як дойсц до „старт-ап” кредитох и яки условия же би ше до нїх дошло, та покраїнски секретар гварел же тих дньох будзе схадзка зоз Министерством польопривреди, же би ше одредзело точни условия за доставанє тих „старт-ап” кредитох.
ВЕЦЕЙ ПЕНЄЖИ ЗА ТРАДИЦИЮ
Тото цо нове од того року, то же Покраїна од того року видвоєла три раз вецей динари за потримовку орґанизованя традицийних манифестацийох. Тиж так, на векши уровень подзвигнуте и сотруднїцтво Покраїни и локалней самоуправи кед у питаню отримованє дильовох, виходних драгох зоз валалу и правенє местох за отресованє тракторох и машинох же би ше блато нє уношело до валалу.
Директор фонду за польопривреду Александар Боґданович упознал парастох зоз кредитами котри понука держава, о кредитних лимитох и каматох за купованє новей механїзациї, пластенїкох и склєнярнїкох, процивкаменцових мрежох, копанє студньох и купованє системи за залїванє, опреми за пчоларство и вецейрочни засади.
До Коцура, окрем покраїнского секретара мр Вука Радоєвича и директора фонда за польопривреду Александара Боґдановича, пришли и його помоцнїки Младен Петкович и Владислав Крсманович, а з локалней самоуправи бул предсидатель Дочасового орґану Општини Вербас Милан Ґлушац и предсидатель Месней заєднїци Коцур Желько Бєлан.
