Интернет премесциц до дньовей хижи

автор сас/дюв
1.2k Опатрене

Безпечносц дзецох и младих постава вше векши дружтвени проблем, а пробує ше го ришиц зоз уключованьом цо векшого числа гражданох, родичох, наставнїкох и професорох… Нагле пороснуце интернет апликацийох и мобилного телефона, и вообще хаснованє сучасней технолоґиї, то вельки испит и спокуса.

У Основней школи „Йован Йованович Змай” у Дюрдьове о тим проблему бешедоване на вецей заводи. Єден з векших проблемох за школярох праве тот, же родичи нє свидоми цо їх дзеци робя на интернету и вична дилема – як преценїц же на кельо роки дзеци пущиц, бо су самостйни. До кеди их контроловац и надпатрац? Єден з позитивних прикладох то Словения, у котрей компютер котри повязани з интернетом поставени у дньовей хижи, нїяк у видвоєней, „нє видлївей” просториї. Прето є так файта контроли и надпатрунку.

У дюрдьовскей школи о тим проблему зоз школярами на вецей заводи бешедовали педаґоґиня Миряна Бубалович, наставнїца информатики Юґослави Радєн и психолоґиня Соня Шанта.

СПОКУСИ НОВИХ ТЕХНОЛОҐИЙОХ

Як указали дзепоєдни випитованя, кажди штварти родитель нє упуцени до того цо його дзецко опатра и роби на интернету.

– На основи бешеди зоз нашу психолоґиню у школи и дзекуюци каждодньовей роботи и бешеди зоз школярами заключела сом же нам потребне преподаванє компетентних, и же би воно барз значело школяром. Ґу тому, познати ми факт же ше у остатнїх пейцох рокох нагло звекшало насилство и злохаснованє на интернету, у цалей держави. Думам же нас тото дочекало нє барз порихтаних, окреме старши ґенерациї. Тиж, спрам виглєдованьох, кажде треце дзецко дожило електронске насилство. Попри тим, и я мам власни искуствия – визначує педаґоґиня Миряна Бубалович.

Фондация „Тияна Юрич” єдна зоз найактивнєйших коло того. У шлїдуюцих трох мешацох обидзе штерацец места ширцом Сербиї и отрима трибини на тему „Безпечносц дзецох”. Предпрешлого тижня, кед були у Новим Садзе, вихасноване их пребуванє, та су поволани и до Дюрдьова. Предочованє проблему на автентични споопсоб, и на школярох и на наставнїкох, охабело вельки упечаток.

УКАЗАЦ НА ПРОБЛЕМИ, НЄ ЗАСТРАШОВАЦ

Фондация „Тияна Юрич” снована зоз задатком же би злєпшала безпечносц дзецох и зачувала здогадованє на Тиянов траґично закончени живот. Дзекуюци витирвалосци и упартосци, за тот случай чули велї у нашей держави, та и ширше. Теди порушани глїбши розумованя ии свидомосци о сиґурносци интернета, алє и системи котри заостава за потребами котри виволали нови технолоґиї, котри ше дотикаю сиґурносци и безпечносци шицких возростних ґрупох.

Интерактивне преподаванє отримали єден зоз сновательох Иґор Юришич, и Михаела Немет и Иґор Юрич. Автентични способ предочованя опасних ситуацийох на интернету на дружтвених мрежох, на школярох охабели моцни упечатки.

– Провадзели зме дзеци на интернету, на отворених профилох на дружтвених мрежох. Видзели зме кельо маю приятельох, як ше справую, и после даскелїх дньох, кед зме закончели преподаваня, число їх подозривих приятельох ше зменшало. Нам то бул добри знак же роздумовали о тим цо зме приповедали, же висцерали „приятельох”, и нє жадаю зоз нїма мац нїяки контакт. З помоцу филмох зме ище на вирнєйши способ приказали опасносци котрим им грожа кед виду зоз учальньох. Треба препознац кеди дзеци злохасновани, кеди их на интернету дахто пробує злохасновац – гвари Иґор Юришич.

Поента же бизме дзецом указали на цо вецей факти котрима мож препознац фалшивих приятельох и злохаснованє дружтвених мрежох. Дзеци и млади муша сами препознац проблем, же би нє постали жертва – снователь фондациї „Тияна Юрич”.

ШИЦКИ МОЖЕМЕ ПОСТАЦ ЖЕРТВА

Рок после траґедиї, на инициятиву Тиянових родичох, Народней скупштини вигласани „Тиянинов закон”. Зоз нїм прилапена инициятива же би милиция за нєставанє малолїтней особи нє чекала 24 годзини, алє акцию започало такой после прияви. Гоч вименка вельо допринєсла ефикаснєйшому ришованю случайох, у тарґовини з людзми, педофилиї, насилстве у школи медзи парняками… то ище вше нєдостаточне. До охрани треба же би було уключенє цале дружтво.

– Преподаванє було барз добре орґанизоване, тримало увагу дзецом. Мали барз добри приклади. Видзи ми ше же значносц и чежину бешеди дал Иґор Юрич котри з власного искуствия шведочи о нємилих подїйох котрим виложени шицки хаснователє дружтвених мрежох. Вон ма реални проблем, нє засновани лєм на теориї. Пачи ми ше же дзецом понукли помоц, потолковали им дзе можу найсц їх контакти. Гварел им же нїґда нє треба же би родумовали же ше им нє може нїч подле случиц, бо за таке нєт правила, анї же кельо ма особа роки, анї чи є з валалу, чи з варошу – гвари Соня Шанта, психолоґ у Основней школи.

Представителє дюрдьовскей Основней школи и надалєй планую сотрудзовац зоз тоту Фондацию, окреме же їх преподаванє охабело упечатки на школярох яки потребни же би им ше предочело шицки можлївосци, алє и пошлїдки котри исную зоз приступом интернету. Прето ше планую приключиц и буц часц у їх проєктох у наиходзацим периодзе и за други возрости школярох у ОШ.

ПРАВДИВИ ПРИПОВЕДКИ ТИНЕЙДЖЕРОХ

Преподаванє у дюрдьовскей школи котре ше представи ище по 40 школох у Сербиї обдумали фаховци. Нє настрашиц дзеци, алє их порихтац. Предочиц им же яки єст можлївосци, позитивни и неґативни приклади дружтвених мрежох зоз краткима видео знїмками правдивих приповедкох тинейджерох зоз нашей держави.

Бешедовали им и о значносци формованя лозинки, же шицки котри хасную интернет буц злохасновани, як препознац нєправи профил на дружтвених мрежох, значносци числа товаришох на истих, та и же кажде ма право нє прияц дакого за товариша, алє и о тим же нєдавно застановене однїманє дзивчеца дзекуюци дружтвеним мрежом, бо шицки подзелєли фотоґрафию тей особи цо нєстала, котру препознал вожач автобуса и приявел милициї же ше находзи у його автобусу на драги ґу виходу зоз держави.

16997862_594918097364971_6270729546083474518_n

ПОВЯЗАНИ ТЕКСТИ