ВЕРБАС – Хор вербаского Културно-просвитного дружтва „Карпати” тиж будзе шпивац гимну Сербиї у Народней скупштини Сербиї, дознава Рутенпрес после нащиви народней посланїци Олена Папуґа вербаскому дружтву.
Як плановане, Хор КПД „Карпати” би гимну Сербиї „Боже правде” мал шпивац на початку єшеньского зашеданя Народней скупштини у Беоґрадзе, о чим Папуґова штварток 7. септембра, бешедовала з членми Хору, дириґентку Хору Надїю Воротняк и предсидательом Дружтва др Деяном Загорянскийом.
Будзе то треци хор з рускей заєднїци хтори гимну Сербиї будзе шпивац на шветочносци з нагоди початку нового зашеданя Народней скупштини Сербиї, пред народнима посланїками, найвисшима державнїками и представителями институцийох, як и дипломатского кору у нашей жеми. Дотераз тоту чесц мали Хор „Гармония” з Нового Саду и Мишани хор Дому култури Руски Керестур и Катедралней церкви св. о. Миколая з Керестура.