И нашо школяре наградзени на Смотри кирилскей писменосци

автор мар
790 Опатрене

ТИТЕЛЬ – У Народней библиотеки „Стоян Трумич” у Тителю вчера, 24. мая,  додзелєни награди за найлєпши писмени задатки написани на сербским, болгарским, македонским, русийским, руским и українским язику, потим за найкрасши рукопис у писменим задатку, як и за кирилкову калиґрафию (краснопис), хтори вибрани на Петнастим конкурсу Смотри кирилскей писменосци у орґанизациї спомнутей библиотеки. Награди достали и школяре з Руского Керестура, Коцура и Дюрдьова.

У катеґориї младшого возросту (3. и 4. класа ОШ) наградзени Кристиян Будински и Ксения Вереш з Дюрдьова, а у катеґориї штреднього возросту (5. и 6. класа ОШ) награди достали Анастазия Надь и Милица Малинович з Руского Керестура и Катарина Недич з Коцура.

У катеґориї старшого возросту  (7. и 8. класа ОШ) наградзени Мануела Кучмаш и Александра Русковски з Коцура, як и Михайло Рацпети з Руского Керестура.  Награду за найлєпши состав написани по руски освоєла Марина Надь з Керестура, з тему „Нє дзеци зме вецей”. За писмени задаток на сербским язику наградзена Валентина Михняк з Дюрдьова.

Награди за школски писмени задаток на руским язику за штредньошколцох достали Мартина Афич, Дорис Бучко и Ґабриєла Хома, шицки з Руского Керестура.

За рисунок инициялох з кирилкову калиґрафию наградзени Дарко Провчи з Керестура и Єлена Мудри з Дюрдьова, диплому достала Андреа Мушицки з Дюрдьова, а награду за моноґрам достала Тияна Петрович, тиж з Дюрдьова.

Школярох котри зоз своїма роботами участвовали на Конкурсу пририхтали наставнїци руского язика Каролина Папуґа, Ксения Шовш и Люпка Малацко у Руским Керестуре, Снежана Шанта у Коцуре, учителька Єлена Салаґ и наставнїца сербского Даниєла Самарджич у Дюрдьове, як и наставнїци подобовей култури – Александра Медєши у Керестуре и Тат’яна Перович у Дюрдьове.

 

 

ПОВЯЗАНИ ТЕКСТИ