РУСКИ КЕРЕСТУР – Вноци з вовторку на стреду (6. на 7. юний) коло пол ноци рускокерестурски хотар залапел вельки запор, з блїсканьом, гирменьом и каменцом у дзепоєдних часцох валалу и хотара, а як гваря упутенши, каменєц вноци права ридкосц.
Дробнєйши каменєц падал на Сейкох и у часци Медєшу, та очкодовал посадзени култури у хотаре.
Керестурци котри осиґурали свойо поля под паприґу и польодїлскима културами, осиґуруюцим хижом у наступних дньох можу приявиц очкодованя, же би компетенти фаховци цо скорей вишли на терен и зазначели пошлїдки каменцу.
З каменцом нападало и вельо дижджу, та так у дзепоєдних часцох Керестура, односно хотара спадло и до 30 литри по квадратним метеру, на сейкох 35, док на Ярашу дижджу вообще нє було, а досц дижджу спадло и вчера вноци.
