РУСКИ КЕРЕСТУР – Вчера, на Нєдзелю шицких святих, вирни рускокерестурскей парохиї св. оца Миколая ше зоз заєднїцку молитву прейґ Панахиди здогадли на шицких своїх покойних.
Панахиду служели троме домашнї священїки – парох о. Михайло Малацко и капеланє о. Владимир Медєши и о. Михайло Шанта, а парох у казанї потолковал значенє того молитвеного чину.
– По нашей вири до воскрешеня – теметови святи места, прецо ше о нїх и стараме. Ту ше модлїме за наших покойних, бо нам Бог дал можлївосц заступац ше єдни за других. И тото место жалосци у Богови постава место радосци – преход до вичного живота – гварел парох о. Малацко.
О. Малацко з тей нагоди здогаднул и на дакедишнї два теметови у Керестуре – перши коло самей церкви, а други коло бегелю, дзе ше планує положиц памятни криж, же би ше на ньго нє забуло.
На Панахиди на теметове було вельо Керестурцох, як и тих котри пришли з других местох помодлїц ше за своїх похованих у Керестуре. По заєднїцкей Панахиди, священїки благословели и поєдинєчни гроби покойних по жаданю їх найблїзших.
