Звонко Гайдук, Руснак, Керестурец котри ше з родичами виселєл седемдзешатих рокох до Австралиї на свойо 17 роки. Остал у далєким швеце на другим континенту, познатим по кенґурох, нойох, цеплей клими, вельких пустиньох, мултикултуралносци, милионских городох, алє и вельких и широких можлївосцох за напредованє.
Звонко штварте дзецко своїх родичох, котри у тедишнї час надумали пойсц даґдзе до иножемства за лєпшим животом, з чим би себе олєгчали тедишню ситацию.
– З родичами до швета пошол лєм я. Нє знам чом оцова одлука була Австралия, алє зме го потримали. Мойо три шестри теди уж були пристановени и мали свой живот, та их нє интересовало путованє з нами. Початок на далєким континенту бул наисце чежки. Дружели зме ше зоз людзми шицких народносцох, то центер мултикултуралносци
Звонко у младосци, з кенґуром на „ти”
дзе зме шицки були ровноправни и шицки зме мали исти можлївосци, лєм завишело од того же хто кельо порихтани жертвовац и дац од себе – гварел Звонко.
Же ше раз враци до родного валалу, гвари, знал ище того дня кед одходзел оталь. У далєкей цудзини виховали двойо дзеци у малженстве з першу супругу, син Майкл успишни пилот, а дзивка Наташа Бянка вишколована правнїца, нажаль однєдавна нє медзи живима.
У Бризбейну Звонко ма нєвесту Сару и дзевецрочну унуку Мишел, так же ше руске презвиско Гайдук там и далєй затримало. Дзеци були свидоми свойого походзеня, и знали же им оцец Руснак.
– Родичи ше з Австралиї врацели до валалу после пейц рокох, та ту и остали. И я теди думал жеше врацим, та сом послал мойо ствари з нїма до Керестура, алє два тижнї пред одходом сом ше предумал и остал – приповеда Гайдук.
– Першираз сом пришол туристично после длугоких седемнац рокох, одушевиє котре сом теди дожил я вам нє можем описац. Пришол сом до мойого родного валалу, такого красного, ґу своїм. Я толкуєм же дом там дзе чловек першираз заплаче и дзе його мили. Барз ми було интересантне, так ме цагало присц до Керестура, же сом ходзел дакеди и два раз до рока. Думам же сом тераз пришол за стално, алє нє забудзем на Австралию и на путованє по швеце котре тераз плануєме зоз Геленку – описує Гайдук.
ТУ УПОЗНАЛ И БУДУЦУ СУПРУГУ
На цалком нєзвичайни способ, кед станул помогнуц на драги ґу превозки котра стала погубена, упознал и свою, тераз будуцу супругу Єлену Шантову з Коцура. После упознаваня и приятельского друженя, ришели започац малженски живот.
– Мило ми же сом упознал мою Єлену, як ю волам – Геленка. Вона моя друга половка з котру плануєме, радуєме ше и препровадзуєме свой шлєбодни час. Нєодлуга плануєме пойсц на єдно путованє, сцем же би и вона видзела дзе сом препровадзел свой живот, же би упознала мойого сина Майкла. Одведзем ю до Австралиї най упозна цалу Симпсонову пустиню котра ме оушевює зоз свою природу и цихосцу. Попри тим вше сом мал жаданє буц медзи Руснацами, оженїц ше з Рускиню, бешедовац по руски. Снуєм нову заєднїцу зоз жену котра ми порихта бобальки, крачунчок по нашим обичаю и шицко як тому спада – з ошмихом и радосцу приповеда Звонко, и додава же люби шицких Руснацох и шицко цо руске.
– У Керестуре сом купел хижу, котру оправям и присподобюєм ґу своїм потребом и смаку. Пейц мешаци сом вєдно з майстрами робел на оправяню и правеню того дому. У дворе место дакедишнєй пайпи зме справели модерну хижочку, у гумнє курнїк з двацец шейсц кредлочками чийо кукуриканє и оздзиванє слухаме як раншу музику. У дворе маме два пшички, плануєм купиц и пару павурох чийо лепези буду крашиц и збогацовац наш двор. На яр, док будзе хвиля, плануєм привесц маляра котри ми намалює даскельо малюнки з природи: Плитвицки озера, фазана, билу голубицу з желєним конарчком и подобне – бешедую Звонко и Геленка, котра додала же єй нє чежко присподобиц ше на керестурски живот кед ю уж тадзи принєсла животна драга. Обидвойо су подзековни Богови и судьби на такей животней драги.
ОБЧЕКУЮ ГОСЦОХ
– Син Майкл котри жиє у Абу Дабию гварел же кед я останєм у Керестуре, придзе нас опатриц, та же то будзе и його други дом. Сара Гайдукова, мац моєй унучки Мишел котри жию у Бризбейну тиж поволани, та обецали же нас нащивя у моїм родним валалє.
Два роки у рудокопе пробовал дойсц до опалу
ОД РОБОТИ НЄ СЦЕКАЛ
Ище як омладинєц ше лапал до шицких файтох роботи, нїґда нє бул заняти лєм на єдним роботним месце, дакеди источашнє робел и три роботи.
– Нє бал сом ше нїч робиц, знаходзел сом ше на шицки способи, а мойо напредованє було препознате, та можем повесц же так кед ше напредує, то потримує держава. Робел сом од початку од седемнац рокох, а кед сом крочел на австралску жем, нє знал сом анї єдно слово язика, писал сом себе на папер основни поняца, та сом ходзел з папериками. Язик сом учел у двох школох, пондзелок и стреду у єдней школи, а штварток и пияток у другей. Виплацел ше мой труд. Попри моєй порядней роботи, робел сом вше и дополнююцу, вожел сом такси, туристични автобус… Уживал сом у каждей туристичней тури, так сом научел и велї язики, чечно бешедуєм по анґлийски, сербски, руски, словацки, а розумим и можем ше спорозумиц на италиянским, шпанским и французким язику – гвари наш собешеднїк, хтори робел аж и у рудокопе опалу, цо познате же то єдна з найчежших роботох у штред австралийскей пустинї.
– Перши два роки вєдно з оцом зме ше опробовали у копаню драгоциного каменю опалу, цо нас приведло до того же зме безуспишно робели, та зме ше нашли у ище горшей ситуациї як кед зме пошли там. Шицким то випатрало як можлївосц, алє то засноване на щесцу и приповедкох же хтошка раз нашол вельки камень. Вец зме три роки робели вєдно з мацеру же би зме заробели пенєж з хторим ше врациме дому – толкує Звонко Гайдук.
АВИОНИ МУ ПРИ ШЕРЦУ
Одушевиє и любов ґу авионом ноши зоз собу ище од дзецинства, а дзекуюци велїм познанством котри здобул през велї роки, и законченей школи за пилота, за свою душу авион зна и гонїц. А у своїм доме ма вельо слики и макети рижних файтох лєтачкох.
– Уж анї нє паметам кеди сом першираз управял з авионом, було то наисце давно. Нє раз сом ше нашол у кокпиту путнїцкого авиона, док у нашей держави Сербиї, як ю я наволуєм „Красавица Европи”, поряднє лєцим на воєним млазним авиону. Адреналин котри доживюєм на тих лєтох бим нє менял нїзач. З вельким задовольством шедам на пилотске место и дзвигам ше „до нєбесох”. Уживам у красотох Копаоника и Златибора кед ше там спущим. Наш валал Руски Керестур сом на єден завод знїмал з камеру од горе, алє теди сом лєцел з меншу швидкосцу – бешедує вон.
И оцец и син пилотую
Же би зоз свою супругу цалком уживали, Звонко купел авто и цалу рибарску опрему, понеже люби и риби лапац, нє пре вельки улов, алє пре чувство вицагованя риби на циґонь. Док огреє, планує купиц рибарску дозволу, та ше опробує на войводянских водох.
За 47 роки, кельо бул у Австралиї, шнїг видзел лєм раз, а тераз ище раз и зрадовал ше му як нїґда.
– Як мале дзецко сом ше радовал шнїгу, бегал сом з камеру и знїмал пахульки, мали кришталї котри шицко доокола як били тепих прекрили. Дармо, любим тот мой валал – закончує Звонко Гайдук.