Кирбай преславени з владиком и 17 священїками

автор маф
1.2k Опатрене

РУСКИ КЕРЕСТУР – Парохия св. оца Миколая у Руским Керестуре, зоз своїма госцами, з Архиєрейску Службу Божу на 10 годзин вчера преславела дзень преношеня мощох свойого нєбесного заступнїка св. о. Миколая – Кирбай.

Архиєрейску Службу Божу у Катедралним храме предводзел преосвящени владика Георгий Джуджар, а сослужели седемнац священїки – троме домашнї и з парохийох нашого Егзархату, з Крижевского владичества, и францински монах зоз Суботици.

Владика у казанї повинчовал Кирбай и здогаднул на подобу св. Миколая та пожадал же би шицки шлїдзели його найвекши чесноти милосердиє ґу ближнїм.

Службу Божу зоз своїм шпиваньом возвелїчал домашнї Хор Катедралней церкви св. оца Миколая и Дому култури Руски Керестур под руководзеньом Лидиї Пашо, а солиста бул Михайло Рамач. Апостол читал домашнї дзияк Янко Виславски, Євангелию о. Данил Задрепко, а швичкаре були члени Церковного одбору.

Попри домашнїх, на Служби було и надосц госцох з наших местох, шестри Служебнїци, панїматки, представителє Националного совиту Руснацох, як и Керестурци котри жию у блїзших и дальших жемох.

По Служби Божей бул одпустови обох коло церкви, хтори ше закончел з читаньом Євангелиї на шицких штирох бокох швета, а владика по каждим и пошвецел храм и присутних вирних.

Як и кажди рок, богата була и вашарска часц Кирбаю.

ПОВЯЗАНИ ТЕКСТИ