БЕОҐРАД – Традицийни, а 14. по шоре Кирбай, котри ше у беоґрадскей парохиї слави 24. мая на швето св. Кирила и Методия, понеже ше вше преноши на соботу после швета, будзе преславени нєшка у улїци Вишеґрадска 23, на 11 годзин.
Службу Божу будзе предводзиц мр Михайло Малацко, парох керестурски, а попри домашнього пароха о. Владислава Варґи, на Кирбай поволани и други паноцове.
З оглядом же Кирил и Методий були святи ище кед ше Христова Церква нє подзелєла, на Кирбай приду и представнїки Православней, Євангелицкей и Анґликанскей Церкви, а у сали после Служби будзе друженє зоз закуску и народнима писнями котри виведзе познати шпивач Йовґен Надь з Нового Саду.