КОЦУР – Вчера, 28. авґуста, у Коцуре преславене швето Успениє Пресвятей Богородици – Велька Матка Божа по юлиянским календаре, односно Кирбай, хтори у Коцуре означую и грекокатолїцка и православна церква.
Вирни швето преславели на службох Божих, а з нїм ше Церква здогадує на одход Пречистей Дїви Мариї з того швета, кед є по християнскей традициї на нєбо вжата и зоз своїм целом.
Вельку Службу Божу у коцурскей грекокатолїцкей церкви предводзел апостолски еґзарх за грекокатолїкох у Сербиї владика Георгий Джуджар, а сослужели священїки з наших парохийох и госци.
У своєй казанї кир Георгий бешедовал о значносци швета за шицких вирних и здогаднул на вельки жертви Пречистей Дїви Мариї.
Преслава Велькей Матки Божей у Коцуре почала внєдзелю, 27. авґуста, з означованьом 45-рочнїци пошвецаня митрофорного протопрезвитера о. Владимира Мудрого, родом з Коцура, а котри тераз жиє у Канади.