БЕОҐРАД – Европски рух у Сербиї початком того тижня отворел конкурс за студентох закончуюцих рокох на факултетох у Сербиї за участвованє у проєкту „Путуєме до Европи”. Конкурс отворени по 16. юний, а шицки потребни информациї и формулари за конкурс мож найсц на веб-сайту проєкту – www.putujemouevropu.org.
На конкурсу буду вибрани 50 студенти, чийо мена буду обявени 1. юлия. Студенти достаню интерейл-карти, медзинародне драгове осиґуранє и пенєж за драгу. На драгу ше руша 23. юлия, перша станїца будзе Берлин, а о три днї студенти сами вибераю свойо дальши дестинациї.
Можу конкуровац студенти державянє Сербиї, старосци до 26 роки, уписани на закончуюци роки основних и мастер студийох и абсолвенти на державних и приватних универзитетох у Сербиї.
За тото безплатне путованє до Европи буду ранґовани на основи успиху на факултету, длужини студираня, зняня странского язика, материялного стану и скорейших путованьох по жемох Европи.
Проєкт ше уж 13 роки витворює у сотруднїцтве з Фондацию Роберт Бош и Балканским фондом за демократию, а тогорочне виглєдованє указало же 35 одсто гражданох Сербиї нїґда нє путовали до даєдней жеми у Европи, док процент младих котри вообще нє путую 15 одсто. Найчастейша причина за нєпутованє подлєйши материялни стан.