На своїм нєзвичайним паломнїцтве — пешо до Єрусалиму, Розана Брусадели зоз Швайцарскей початком новембра нащивела и Руски Керестур. Була госц на стретнуцу „Слова живота” дзе подзелєла искуство о своїм нєзвичайним паломнїцтве. У розгварки з ню нам помогнул Дане Макаї як прекладатель.
Розана шейдзешатпейцрочна пензионерка зоз Швайцарскей, по фаху медицинска шестра, алє остатнї 40 роки роботного вику препровадзела у центру Марийового дїла у Баару нєдалєко од Цириху. Духовносц Марийового дїла упознала на єдним друженю у своєй парохиї. О тим гварела:
– Кед зме були мали оцец нам часто бешедовал о живоце святих, алє нєодлуга, кед пришли велї спокуси пубертету, питаня, подумала сом себе, дзе тоти святи нєшка, и же то лєм прешлосц? На тим сходзе єдна дзивка подзелєла свойо искуство о тим як купела нову ленийку и нє сцела ю пожичиц нїкому, алє знаюци же би Исус так нє поробел, превозишла себе и дала. То єдна банална ствар, алє сом себе такой подумала же так вироятно робели и тоти святи о хторих нам оцец бешедовал – здогадує ше Розана.
УПОЗНАВАНЄ НАРОДОХ И ДЕРЖАВОХ
И так почина єй духовни живот вше у служби других виполнєти з виру. А о терашнїм путованю нам потолковала:
– На тото паломнїцтво до Єрусалиму сом ше одлучела ище скорей, бо ми то нє перше. Потераз сом ишла пешо до Сантияґу ди Компостела (Шпания), и зоз Швайцарскей до Риму. Паломнїцтво до Єрусалиму ищe у розвиваню, потераз сом штварта хтора провадзи тоту драгу, так же тиж участвуєм у його креированю. Перши паломнїк на тей драги бул єден зоз Австриї, а намира му була направиц медзинародну драгу хтору би могло предложиц и другим. Циль же би зоз преходом през рижни держави могло их баржей упознац, и на таки способ твориц мир и любов.
СПОЗОРЕНЄ ПРЕ БАЛКАН
На драгу до Єрусалиму Розана рушела 26. мая того 2018. року. Прешла цалу Австрию, часц Братислави, Мадярску, сцигла до Беоґраду, дзе ше затримала дакус и предлужела далєй на юг. Планує прейсц Македонию, Греческу, Турску, по Сирию, дзе пре обставини у держави до Єрусалиму препутує на авиону.
– Рушаюци ше, сама себе сом гварела же тото паломнїцтво ма буц паломнїцтво мира, диялоґу и любови – приповедала Розана. – А през драгу наисце сом мала полно стретнуца з велїма особами дзе сом могла жиц шицки три ствари хтори сом себе визначела. Нїґда сом нє почувствовала же сом сама, прето же чувстуєм Божу присутносц и мой сопутнїк Бог. Кед бим верела лєм 99 одсто, нє було би достаточно, бо лєм 100 одсто вира „бави”.
Кед мойо познати чули же преходзим през Балкан, гварели ми же най меркуєм, най будзем осторожна, понеже думанє о Балкану нє найлєпше. Одвитовала сом же нє идзем стретнуц Балканцох, вибеженцох, народи, алє особу як єдинку. У каждей особи намагам ше видзиц Исуса и любиц го. То ми наисце дава шлєбоду исц вочи ґу каждей особи. Потераз сом стретла вельо особи и мала их нагоду баржей упознац. Окреме у Сербиї, почувствовала сом вельку госцолюбивосц, дарежлївосц и любов велїх нєпознатих – потвердзела наша собешеднїца, хтора и на своїм блоґу за шицких у Швайцарскей написала же Сербия нє така як ше о нєй бешедує на ТВ и медзи собу.
МАЮ МАЛО, А ДАЛИ БИ ШИЦКО
На своєй драги, у єдним ресторану, кед сцела виплациц, Розани одвитовали єй же шицко ґратис, прето же є паломнїцка. Тиж, єдна стара жена ю прияла преноцовац, дала єй вечеру и фриштик, а кед одходзела, порихтала єй єден пакет и дала 500 динари.
– Мушела сом вжац, нє допущела ми иншак. Барз зме зворушело, кельо мало маю, а дали би шицко – гварела Розана.