КОЦУР – Пондзелок, 25. децембра, у римокатолїцкей церкви Шицких Святих у Коцуре з нагоди Крачуна по григориянским календаре, отримана Служба Божа котру служели о. Кароль Сабадий и о. Карло Милер.
У Служби крачунски коляди шпивала мишана шпивацка ґрупа и дзеци котри ходза на виронауку и на мадярски язик.
После Служби була програма у котрей дзеци шпивали и рецитовали, а була приказана и драмска сличка о народзеню Исуса Христа.
Програма, котру з дзецми порихтали Ґабриєла Зупко и Дюра Макаї, була на сербским и мадярским язику.
Бетлегем котри хасновани у драмскей слички за тоту нагоду направела Снежана Радошевич, а облєчиво уступела коцурска грекокатолїцка церква.
Шпивацку ґрупу Михал Иван Ниґер провадзел на ґитари, а Мария Мезеї грала на орґульох.
По законченю програми шицки дзеци у церкви достали пакецики котри обезпечел Церковни одбор.