МИКЛОШЕВЦИ – Тогорочна 32. Културна манифестация „Миклошевци 2017” всоботу, 26. авґуста почала з виставу ґобленох у просторийох Основней школи и з Поетско-музичним вечаром, хтори з найвекшей часци бул пошвецени творчосци Агнети Бучко Папгаргаї з Нового Саду, родом з Миклошевцох.
Агнета Бучко Папгаргаї публики з Миклошевцох и других руских местох у Горватскей, алє и з Войводини, пречитала вецей свойо поетски твори, а о творчосци Бучко Папгаргайовей бешедовал Микола Шанта з Коцура, редактор єй вецей кнїжкох обявених у Видавательней дїялносци НВУ „Руске слово” Нови Сад.
У музичней часци програми наступела Женска шпивацка ґрупа КУД „Яким Ґовля” з Миклошевцох и други домашнї шпиваче, котри одшпивали вецей шпиванки компоновани на тексти Агнети Бучко Папгаргаї.
Як госцинска, з мини-концертом новших руских шпиванкох на Поетско-музичним вечаре наступела и наша шпивачка Ана Римар з Петроварадину.
Як Рутенпрес дознава од Миколи Шанту, соботову програму у Миклошевцох провадзела и менша делеґация КУД „Жатва” з Коцура, як и предсудатель Вивершного одбору Националного совиту Руснацох Желько Ковач.