Лїченє у иножемстве з потвердзеньом РФЗО

автор днв/мар
1.4k Опатрене

СЕРБИЯ – Почина сезона рочних одпочивкох, а гражданє Сербиї найчастейше лєтую у Греческей, Чарней Гори и Горватскей, та попри уплаценого туристичного аранжману, треба обезпечиц и драгово здравствене осиґуранє.

Републични фонд за здравствене осиґуранє ма подписани медзинародни спорозуменя зоз 20 жемами – Австрию, Польску, Белґию, Румунию, БиГ, Словацку, Болгарску, Французку, Вельку Британию, Голандию, Италию, Горватску, Луксембурґом, Чарну Гору, Мадярску, Ческу, Македонию, Словению, Нємецку и Турску, цо значи же шицки осиґуранїки, односно котри маю оверену здравствену кнїжочку, под час туристичного пребуваня у даєдней з тих державох можу достац наглу медицинску помоц о трошку РФЗО.

Окончователь длужносци директора РФЗО Верица Лазич гварела же осиґуранїки пред одходом на драгу муша мац двоязични формулар, окрем за Польску и Вельку Британию, за цо нєобходни лєм доказ о осиґураню и пасош.

– Двоязични формулар видава компетентна филияла РФЗО, на основи резултатох и думаня Лїкарскей комисиї же особа нє хорує, тє. же нє хоровала од акутних, лєбо хронїчних хоротох у акутней фази за остатнї 12 мешаци – гварела Лазичова за Танюґ.

Як толкує, важне же би осиґуранїк нє бул у стану хтори по самим приходзе до иножемства вимага длугше лїченє у шпиталю, думаюци ту и на ваготносц.

Резултати и думанє вибраного лїкара и оверену здравствену кнїжочку/карточку осиґуранїк придава особнє Лїкарскей комисиї компетентней филияли РФЗО. Формулар ше видава найдлужей за период до 90 днї од датума видаваня, и то безплатно.

ПОВЯЗАНИ ТЕКСТИ