После вецей як три мешаци, кельо прешло од виберанкох у Македониї, тота держава ище вше нє ма нову владу. Нє ма анї конституовану Скупштину (Собранє), а понеже нє ма предсидателя тей истей скупштини, нє можу буц розписани анї локални виберанки, гоч законски рок за їх отримованє уж прешол. Зоз єдним словом, кед ше бешедує о власци, тота жем у вакууму и єдина институция хтора леґитимно функционує у полним капацитету то предсидатель Републики.
Медзитим, и од того мали хасен, бо предсидатель Македониї Дьордє Иванов нє пристава дац мандат же би його политични опонент лидер социялдемократскей СДСМ Зоран Заєв формовал власц зоз албанскима партиями, а ВМРО-ДПМНЕ, з чию потримовку Иванов вибрани за предсидателя, а на чиїм чолє Никола Ґруевски нє ма досц посланїкох за векшину. Найкратше поведзено, Иванов нє дава мандат Заєву пре „Тиранску платформу”, хтора була основ за догварку СДСМ-а и албанских партийох, а за хтору вери же може загрожиц Македонию як єдинствену державу. Заєв нє виходзи зоз деталями догварки хтору направел зоз Албанцами, так же о детальох нє мож бешедовац, алє виявел же є на пременки порихтани. Так ше Македония нашла у пат позициї.
У такей ситуациї реално би було обчековац же ше до цалей приповедки умиша и Европа. Нє на тельо прето же нє знам як любя Македонцох, алє прето же би анї ЕУ анї ЗАД анї НАТО нє сцели страциц Македонию, бо єст обаванє же тота ексюгославянска република спаднє под русийски уплїв. И то нє єдина бриґа у Бриселу. Гевто цо их голєм исто тельо трапи кельо и траценє уплїву то евентуални зраженя и то медзинационални. Кед би ше таке дацо случело у Македониї питанє чи би ознова нє почали зоз пирнї викуковац койдзеяки ошлєбодительни войска як цо то було концом прешлого и початком того вику, а то би уж бул озбильни проблем и то нє лєм за реґион, алє и за Европску унию.
Праве прето Европа ше будзе мушиц вецей анґажовац коло Македониї, и то нє так же вибере найлєгчейше ришенє хторе лєм замасци ситуацию, алє так же помогнє Македониї же би ше конєчно стабилизовала. Иншак, свидоми су и у Бриселу, годни зме мац нову кризу и то нє лєм у тей жеми, алє и на добрей часци Балкану. А таке дацо наисце нє треба анї им, анї нам, хтори ту жиєме.
Становиска висловени у тим тексту виключно авторово и нє вше одражую ушорйовацку политику новинох „Руске слово”.