КУЛА – На осемнастей схадзки Скупштини општини (СО) Кула котра отримана вчера, за нового предсидателя Општини Кула вибрани Велибор Милоїчич, дотерашнї предсидатель СО Кула, а источашнє потвердзени даскельо задзекованя функционерох, котри потим вибрани на нови функциї.
Дотерашнї предсидатель Општини Кула Перица Видеканїч нє бул присутни на схадзки, а понеже задзекованє дал 28. мая, у периодзе медзи двома схадзками СО Кула, по закону, о истим нє могло розправяц на Скупштини.
Зоз задзекованьом Видеканїча, функциї источашнє по автоматизму престали и його заменїкови Карольови Валкови и членом Општинскей ради. После задзекованя предсидателя Општини, задзекованя дали и предсидатель СО Кула Велибор Милоїчич, його заменїца Тат’яна Квасни и одборнїца Союзу войводянских Мадярох Ливия Козма.
Схадзка почала зоз минуту цихосци з котру ше одало почесц упокоєному посланїкови Херценови Радонїчови – Кекови, одборнїкови Рускей странки, потим потвердзене преставанє мандатох покойного Радонїча и Ливиї Козма котра задзековала на тоту функцию. Место посланїка Радонїча вибрани Райко Булатович зоз Крущичу, а место Козмовей одборнїцки мандат потвердзени Карольови Валкови.
После потвердзеного задзекованя Милоїчича, зоз схадзку предшедовала найстарша одборнїца СО Кула, Марица Шепински зоз Руского Керестура. На предклад векшинскей Сербскей напредней странки, за предсидательку СО Кула вибрана Тат’яна Квасни зоз Кули, лаборант по фаху.
Початок предшедованя Кваснийовей почал зоз єй предкладом же би Милоїчич бул вигласани за нового предсидателя Општини Кула на штиророчни мандат, цо и потвердзене зоз 25 гласами, а потим вигласани предклад владаюцей странки же би длужносц заменїка СО Кула окончовала Зорица Демкович.
Посланїки з векшину гласох прилапели и предклад нововибраного предсидателя Општини Милоїчича, же би длужносц його заменїка окончовал Кароль Валка. Милоїчич тиж дал предклад же би у составе нового зволаня Општинскей ради були Оливера Булатович, Зорка Вукович, Ливия Козма, Милорад Лазич, Блаґоє Миленкович, Дьордє Перуничич, Радован Раячич, Ана Родич и Наташа Станоєвич, цо тиж прилапене.
Пре нєможлївосц окончованя двойних функцийох, одборнїцки мандати по автоматизму преставаю за Милоїчича и Валку, о чим Општина длужна виробиц акт, а о посланїкох котри приду на їх места будзе розправяне на идуцей схадзки СО.
