ДЮРДЬОВ – Министерство просвити, науки и технолоґийного розвою одбило вимогу Предшколскей установи „Дзецинство” зоз Жаблю, односно його Оддзелєня „Дюрдєвак” у Дюрдьове, хтору потримал и Национални совит Руснацох, же би ше у Дюрдьове формовало, та з тим и финансовало, предшколску ґрупу на руским язику лєм з двоїма дзецми.
Як потолковане, причина одбиваня нєсполньованє законских уловийох же би у ґрупи було голєм пецеро дзеци.
Школска управа Нови Сад предложела же би ше у Дюрдьове формовало мишану воспитну ґрупу на руским язику, хтору би ше финансовало з буджету локалней самоуправи, лєбо же би ше формовало двоязичну ґрупу, у складзе зоз Законом о предшколским воспитаню и образованю, у хторей би часц програми була на руским язику.
На основи того допису, ПУ „Дзецинство” зоз Жаблю, на чолє з директорку Светлану Бошков, предсидательови Општини Жабель 13. септембра послала Вимогу за финансованє мишаней воспитней ґрупи на руски язику з општинского буджету.
У Вимоги наведзене же нарок у Дюрдьове будзе седмеро дзеци за Предшколску програму по руски, та би, пре терашнє менше число дзецох, нє було добре претарговац ґрупу на руским язику.