НОВИ САД – Предсидатель Покраїнскей влади Иґор Мирович вецей як 200 польопривреднїком котри подписали 214 контракти за прейґ 306 милиони динари безповратних средствох з буджету АП Войводини на основи конкурсох, вчера поручел же праве вони фундамент нашого дружтва и польопривреди у Войводини. Бо, як гварел, задаток держави отримац валал и малих и штреднїх продуковательох, а то ше роби и прейґ таких конкурсох.
Предсидатель Покраїнскей влади потвердзел же будзе предлужене з укладанями до польопривреди з подобнима, лєбо ище векшима средствами. Намаганє же би ше одвитовало на шицки вимоги за осучасньованє польопривредней продукциї, а приоритет буду мац мали и штреднї продукователє.
Мирович поволал польопривреднїкох же би у наступних двох-трох тижньох провадзели и нови можлївосци и стимулациї за їх дїялносц з Розвойного фонду Войводини, прето же, як гварел, даскельо стотки милиони динари буду обезпечени за купованє польопривредних машинох з помоцу Фонду за розвой польопривреди.
Терашнї субвенциї по конкурсох наменєни за укладанє до залївних системох, рошлїнскей продукциї у завартим и до системи процивкаменцових мрежох. За залївни системи и копанє студньох подписани 125 контракти вредносци коло 121 милиони динари, з учасцу Секретарияту од 66 милиони динари.
За софинансованє купованя конструкцийох и опреми за рошлїнску продукцию у завартим просторе подписани 57 контракти вредносци 28 милиони динари, з учасцу Секретарияту з нєполнима 20 милионами, а за софинансованє купованя системох за защиту од нєпогодох подписани 32 контракти вредносци 160 милиони динари, дзе учасц Секретарияту 88 милиони динари.
Контракти польопривреднїком уручел ресорни секретар мр Вук Радоєвич.