НОВИ САД – З нагоди рока роботи Покраїнскей влади, єй предсидатель Иґор Мирович медийом вчера представел найзначнєйши резултати и наявел найважнєйши проєкти хтори буду витворени у наступним периодзе.
Мирович на конференциї за медиї, на хторей присуствовали и шицки покраїнски секретаре, наглашел же Покраїнска влада робела як тим и праве то єден з єй квалитетох, а така робота принєсла найлєпши резултати.
Бешедуюци о найвекших проєктох Мирович окремну увагу пошвецел вибудови блокох Б и Ц Клїнїчного центру Войводини и гварел же за тот проєкт обезпечени шицки документи, а тих дньох будзе подписани и контракт з Министерством култури о финансованю вибудови будинку Радио-телевизиї Войводини.
За вибудов маґистралней драги Нови Сад – Рума, з тунелом през Фрушку гору, предсидатель Покраїнскей гварел же то єдини инфраструктурни проєкт у Сербиї хтори ма цалосну проєктну и другу документацию, и же прегварки з потенциялнима инвеститорами можу почац такой.
Мирович тиж наглашел же стопа нєзанятосци зменшана за 13,6 одсто, цо за 5,5 одсто менєй як початком 2016. року. Як гварел, зоз заєднїцку роботу обезпечени 12 000 нови роботни места и скоро кажди тидзень отверана даєдна нова фабрика на териториї нашей покраїни.