Назберани пенєж за операцию очох

автор злк
1.9k Опатрене

У Коцуре штредком мая почала гуманитарна акция за Желька Шанту, школяра другей класи ОШ „Братство єдинство” з Коцура, котри муши пойсц на операцию ока до Русиї, за цо потребни 3 000 еври.

Акция у Коцуре була успишна и назберани пенєж котри нєобходни за Желькову операцию котра будзе 5. юлия – щешлїво гварела Саня, Желькова мац.

– Операция ма буц у Калуґи, у Русиї, по препорученю дохторох котри Желька зоз тей клинїки препатрели у новосадскей приватней ординациї и установели же Желькови можу там помогнуц же би застановели и вилїчели катаракту котра настала после чежкого запалєня ока – потолковала Саня.

ЯК ШЕ ОРҐАНИЗОВАЦ ЗА КРАТКИ ЧАС

Два и пол роки Желька безуспишно лїчели у Покраїнским шпиталю, а по тестох котри робени, установене же причина наставаня тей хороти ґенетичней природи, алє ше може вилїчиц. Кед дохторе поставели конєчну дияґнозу и препоручели операцию, Шантово наисце нє знали на яки способ дойду до того пенєжу за таки кратки час.

Жельков оцец од априла нє роби, преглашени є за технолоґийни звишок у єдней вербаскей фирми, а мац Саня нєзанята, понеже ше стара о старшому синови котри ма епилепсию и церебралну парализу.

Акция за зберанє пенєжу за операцию порушана спонтано, а найзаслужнєйши за ню сушедово котри жадали помогнуц Шантовей фамелиї, як и Желькова учителька и директорка Школи.

Окрем тей суми добре познате же треба ище пенєжу, понеже и потераз у периодзе установйованя дияґнози потрошели вельо, а ище нє знаю же яки будзе и кельо будзе коштац постоперативни период за їх сина, гоч им наглашели же перши три мешаци контроли буду безплатни.

ЛЮДЗЕ НАИСЦЕ СЦЕЛИ ПОМОГНУЦ

До тей акциї уключели ше нє лєм Коцурци, алє на инициятиву коцурскей Школи уключели ше и школи зоз вербаскей општини, алє и Школа зоз Руского Керестура, потим були орґанизовани гуманитарни журки, а ФК „Искра” орґанизовала гуманитарне змаганє.

Коцурски Каритас и Здруженє пензионерох ше тиж уключели до акциї, а були орґанизовани и концерти котри отримали КУД „Завичайне врело” и Младежске здруженє „КУМ”, на хторих назберани добродзечни прилоги.

Школяре приношели пенєжи своїм учительом и оддзелєнским старшином, а попри тим, у догварки зоз Месну заєднїцу, у шицких предавальньох СТР „Любоєвич” у Коцуре були поставени шкатули до котрих людзе могли охабиц добродзечни прилог за Желька.

Тиж так, и шицки людзе добрей дзеки, без огляду зоз хторого су места, могли ше уключиц до тей акциї збераня пенєжу нєобходного за Желькову операцию зоз прилогами на жиро-рахунок Желькового оца Тихомира.

ЗАЧУВАНА НАДЇЯ

– Ми наисце нє очековали же ше телї Коцурци и шицки людзе добрей дзеки уключа до тей акциї. Перше цо нам спадло на розум, було же предаме авто, пожичиме пенєж, бо кредит нє мож достац, алє уж даяк ше пойдзе и до тей Русиї, нє трацели зме надїю – гварел Тихомир.

Зоз Жельком до Русиї пойдзе оцец и там останю 10 днї, понеже, як им пояшнєли, Желька перше препатра, пририхтаю, а потим и оперую. Желько тераз видзи лєм на блїзко и то лєм 20 одсто. Катаракта швидко напредує, и уж му барз очкодовала вид, так же у єдней хвильки зоз 70 одсто, вид му ослабнул на 20 одсто.

З операцию у Русиї Жельков проблем будзе цалком ришени. Шантово у цалей тай приповедки оптимистични, полни надїї и вири же то будзе тирваце ришенє котре Желькови оможлїви щешлїве одрастанє и же шицки вєдно забуду тот стресни и нєприємни период през котри мушели прейсц.

КУЛТУРА ПОТРИМАЛА ЛЇЧЕНЄ

У коцурским кафичу „Оаза клуб 2” всоботу, 10. юния, отримана гуманитарна журка на котрей назберане 30 000 динари як добродзечни прилоги за Желькову операцию.

КУД „Завичайне врело” з Коцура всоботу, 17. юния, отримало Рочни концерт, хтори бул и гуманитарни, понеже приход з уходнїцох наменєни за лїченє Желька Шанти, школяра коцурскей ОШ „Братство єдинство”, котри ма пойсц на операцию ока до Русиї.

З тей нагоди, КУД назберало 40 000 динари и на тот способ потримало акцию.

На концерту у коцурским Доме култури пред числену публику з танцами зоз свойого репертоару наступели госцуюци ансамбли – АКУД УНС „Соня Маринкович” з Нового Саду и КУД „Жатва” зоз Коцура, а на концу наступели домашнї аматере з КУД „Завичайне врело”, хтори публики приказали танци младшей и старшей ґрупи танєчнїкох.

ПОВЯЗАНИ ТЕКСТИ