НОВИ САД – У Руским културним центру у Новим Садзе всоботу, 9. юния, отримани 17. Фестивал дзецинскей творчосци Руснацох Войводини „Веселинка”. Почал у пополадньових годзинох кед на Фестивал пришли госци зоз Руского Керестура, Коцура и з валалу у Републики Горватскей Миклошевцох. Пополадньова програма уж традицийно обдумана през роботнї, та ше и того року рисовали мурали, потим дзеци могли научиц мачовац ше, алє и танцовац.
„Веселинку” отворел подпредсидатель Националного совиту Руснацох Микола Шанта и визначел же лєм ту, на тим Фестивалу у Новим Садзе, даєдни дзеци можу бешедовац по руски зоз своїма парняками, та то нагода присц и бешедовац по руски. Тот Фестивал розвива и дзецинску мрию и креацию през рижни роботнї, а ту и розположенє и друженє. НС Руснацох потримує Фестивал, бо дзеци наша будучносц и то нагода вєдно ше з нїма порадовац.
Пред Фестивалом була отворена вистава малюнкох Хани Кочиш, школярки хтора закончує штварту класу у ОШ „Иван Ґундулич” у Новим Садзе, а на годзини рисованя ходзи уж два роки. Же Хана ма таланту, о тим бешедовал Силвестер Макаї, педаґоґ и подобови уметнїк, хтори виставу отворел и пожадал младей уметнїци най так вредно предлужи, най упише Академию док вирошнє, же би Руснаци мали образованих академских малярох у будучносци.
Потим ушлїдзела програма на котрей ше представели наймладши домашнї, хтори у Новим Садзе ходза на годзини руского язика зоз Предшколскей установи „Радосне дзецинство” з обєкту „Палчочка”, а за наступ их пририхтала вихователька Александра Колбас. У крашнє обдуманей програми у хторей школяре рецитовали, шпивали, ґлумели и танцовали представели ше школяре зоз КУД „Жатва” зоз Коцура, школяре зоз ОШ и Ґимназиї „Петро Кузмяк” зоз Руского Керестура, потим „Партизан 2” зоз хореоґрафиями, длугорочни приятель „Веселинки”. Наступели и новосадски школяре хтори ходза на пестованє руского язика по новосадских школох при наставнїцох Ана Мариї Рац и Олї Яковлєв, а музични точки порихтал Владимир Сивч.
На самим концу програми представели ше госцински зоз Миклошевцох зоз рускима хореоґрафиями танцох и шпиванку.
През програму патрачох водзели Александра Живкович Бучко и Павлина Шепински. Програму провадзели числени госци, медзи котрима бул Йовґен Мудри, заменїк предсидателя НСР, новосадски парох о. Юлиян Рац, одвичательна редакторка „Заградки” Мелания Римар, поетеса Агнета Папгаргаї и други.
После програми у дворе РКЦ ше дзеци предлужели дружиц и танцовац.