ЖДИНЯ (ПОЛЬСКА) – Тогорочна, 36. „Лемковска ватра”, отрима ше од 20. по 22. юлий у месточку Ждиня у южней Польскей, у Малопольским войводстве. На тим фестивалу, хтори того року будзе мац вецей як 1 500 учашнїкох, наступи и Културно-просвитне дружтво „Карпати” зоз Вербасу. Тото госцованє Вербащаном оможлївели Союз Руснацох Українцох Сербиї, Национални совит Руснацох и Општина Вербас.
Членом КПД „Карпати” з Вербацу то нє будзе перши наступ на тим фестивалу, а на тот завод наступя на соботу на пополадньовим концерту зоз фолклорним ансамблом зоз Словацкей „Краснобродичанка”, шпивачку зоз Лосю – Юлию Дошну, єдну зоз найпознатших шпивачкох народней лемковскей музики у Польскей. На истим концерту наступи и ансамбл писнї и танцу зоз Якубянох зоз Словацкей Републики. Тиж так, ту наступя и „Бетяре”, фолклорни квинтет зоз Мукачева зоз України. Ґу нїм ше приключа и свиднїцки „Гелиґонкаре“, хлопски шпивацки колектив зоз Свиднїку зоз Словацкей.
Други наступ „Карпати” буду мац на нєдзелю пополадню, на концерту под назву „Бодай ше когут забановал, кед ме рано пребудзел… ” Ґу уж спомнутим колективом хтори зоз „Карпатами” наступели соботу, приключа ше и репрезентативни ансамбл Здруженя Лемкох зоз Польскей „Семерацка ружа”, як и „Бавнїца”, дзецински ансамбл народного танцу зоз места Жимна Вода при Львове у України. На концерту наступи и театрална ґрупа зоз Ряшова при Прешове зоз Словацкей Републики, а представу за тоту нагоду пририхтала и режирала Лина Гватьова.
На концу додайме же на 36. Фестивалу лемковскей култури буду отримани и числени вистави, округли столи и други манифестациї, а на пияток тот фестивал почнє зоз дзецинским фестивалом „Ватрочка”.
Того року, на фестивалу ше публики представя ансамбли зоз домашнєй Польскей, як и госци зоз України, Словацкей, Сербиї, а постої можлївосц же на фестивалу будзе госцовац и єден лемковски хор зоз Канади.
(На фотоґрафиї прешлорочни наступ членох КУД „Тарас Шевченко” з Дюрдьова)