НОВИ САД – На Медзинародним салонє кнїжкох на Новосадским сайме, на штанду Покраїнского секретарияту за културу, явне информованє и одношенє з вирскима заєднїцами, вчера, 9. марца отримана промоция кнїжки „Шитко” Олени Планчак-Сакач, як найновшей кнїжки за прешли рок у виданю НВУ „Руске слово”.
На промоциї о кнїжки литературних критикох Планчак-Сакачовей бешедовали одвичательни редактор Видавательней дїялносци „Руского слова” Микола Шанта, рецензенти Мирослав Алексич и Ирина Гарди Ковачевич, редактор и лектор Микола М. Цап и сама авторка.
Кнїжка „Шитко” видата з финансийну допомогу Городскей управи за културу Нови Сад.
Наявена розгварка на Салонє з компетентнима особами о драстичним зменшаню финансийних средствох за видавательну дїялносци по руски и на язикох других меншинох – вчера нє отримана.
На штанду спомнутого секретарияту виложени и други виданя нашей установи, а Салон кнїжкох тирва по нєдзелю, 12. марца. Уход безплатни.