НОВИ САД – Спокуси за Церкву, дружтвена нєровновага у Европи, прешлїдзованє християнох у Сириї и Ираку, шлєбода виросповиданя и правда за меншински и векшински заєднїци, шведоченє о климатских пременкох, справдлїва учасц у Божей жеми и єй богатствох, миґрациї у Европи – то були теми, як явели медиї, о хторих бешедовали учашнїки Ґенералней скупштини Конференциї европских Церквох у Новим Садзе, од 31. мая по 5. юний.
На Ґенералней скупштини участвовали представнїки православних, протестантских, анґликанских и старокатолїцких Церквох зоз Сербиї и шицких жемох Европи. Представнїки Апостолского еґзархату за грекокатолїкох у Сербиї нє були присутни.
На отвераню того схода були патриярх сербски Ириней, митрополит заґребско-люблянски Порфириє, епископ бачки Ириней, предсидатель Покраїнскей влади Иґор Мирович, директор Управи за сотруднїцтво зоз Церквами и вирскима заєднїцами Милета Радоєвич и други особи зоз церковного, явного и политичного живота у жеми и иножемстве.
У своєй бешеди за явносц, патриярх сербски Ириней замодлєл же би чолнїки у швеце дзвигли свой глас у борби процив нєсправедлївого и насилного одбераня териториї Републики Сербиї – Косова и Метохиї.