РУСКИ КЕРЕСТУР – Оберачка червеней роговей паприґи у Руским Керестуре почала коло 11. авґуста, тераз є у полним розмаху, а мож обчековац же тота важна робота у Керестуре будзе закончена до конца септембра.
У валалє паприґу одкупюю подприємства „Изґлед” и „Т-пам”, Здруженє керестурских паприґарох „Капсикум анум” прейґ новоснованей задруґи „Керестурска паприґа”, потим Иґор Варґа за купца зоз Заходней Сербиї, Малюш Чунї за своїх длугорочних сотруднїкох, а попри спомнутих, до Керестура приходза и одкупйоваче спред подприємства „Дарком”, як и числени накупци
Початна одкупна цена за першу класу червеней паприґи була 58 динари, а тераз є од 40 до 45 динари, зависно од одкупйовача. Другу класу ше предава од 25 до 30 динари.
Новосц за керестурских паприґарох то предаванє паприґи до ткв. „микс-класи”, хтора од 32 до 34 динари, дзе половка паприґи з першей класи, половка з другей, алє є помишана у истей амбалажи.
Паприґу на предай на велько ше пакує до мехох, ґайбочкох, до бокс-палетох, зависно од купца. Понеже того року зродзела векшином квалитетна паприґа, вельо менше интересованє продуковательох за предаванє „резаней” паприґи на филети, дознава Рутенпрес на одкупних местох.