НОВИ САД – Вивершни одбор (ВО) Националного совиту (НС) Руснацох вчера, 3. марца, у Заводзе за културу войводянских Руснацох отримал схадзку на хторей пририхтани дньови шор за наступне зашеданє НС, хторе будзе на вовторок, 7. марца у у Руским Керестуре, у просторийох Дому култури (на 18 годзин).
ВО прилапел програмни и финансийни документи НС Руснацох, його службох и фахових целох, як и установох хторим НС снователь, лєбо соснователь. Слово о звитох о роботи и финансийних звитох за 2016. рок НС Руснацох, НВУ „Руске слово”, РНТ „Петро Ризнич Дядя” и Заводу за културу войводянских Руснацох, як и планох роботи и финансийних планох тих институцийох и установох за 2017. рок. Спомнути документи буду на дньовим шоре схадзки НС Руснацох, чийо члени о нїх поведза остатнє слово.
Звити и плани НС Руснацох презентовал предсидатель ВО Желько Ковач, а других установох їх руководителє – директорка НВУ „Руске слово” Мартица Тамаш, о.д. директора Заводу Ивана Дудаш и о.д. директора РНТ Таня Арва Планчак.
ВО принєсол предлоги одлукох о менованю нових членох до Роботного цела за младеж, як и о менованю членства до новоформованого Роботного цела за родну ровноправносц, хтори тиж ма потвердзиц НС Руснацох, а потримани и Предлог одлуки о розришеню терашнього составу Управного одбору Заводу за културу войводянских Руснацох.
На схадзки ВО бешедоване и о дзепоєдних маєтно-просторних питаньох, та о проблемох у рускей театралней дїялносци и видавательстве пре драстичне зменшанє буджетских и конкурсних средствох за тоти намени з уровню Покраїни, хтора їх главни финансиєр,