ЖАБЕЛЬ – Општински штаб за позарядово ситуациї Општини Жабель, на позрядовей схадзки котра отримана концом юлия, принєсол Розказ о мирох за зоперанє ширеня и викореньованя африцкей чуми швиньох.
На схадзки бешедоване о старим и о новим Ришеню котре видало Министерство польопривреди, лєсарства и водопривреди – Управа за ветерину ище 16. юлия.
Медзи иншим, бешедоване и о тим же би ше наложело шицким най ше притримую предписаних мирох. Тиж гварене и же забранєне кармиц швинї зоз помиями, алє и забивачка швиньох на ґаздовствох, а на основи анализи ризику и у складзе зоз епизоотиолоґийну ситуацию з цильом застановйованя ширеня хороти.
Вецей о урядових мирох мож пречитац у ришеньох котри обявени на урядовим сайту Општини Жабель.
Здогаднїме же територия Општини Жабель и єй шицки штири населєни места, зоз Ришеньом Министерства польопривреди, лєсарства и водопривреди – Управа за ветерину, котре видате 14. юлия, преглашена за заразне и уґрожене подруче, а на основи анализи за котру прикладнїки випитани дзень пред тим, у населєним месце Жабель.