РУСКИ КЕРЕСТУР – Штварток, 6. авґуста у Парохиї св. oца Миколая зоз Службами на 8 и 19 годзин у церкви, а на 10 годзин у Водици зоз пошвецаньом овоци после Службох означене швето Преображенє Господнє.
Службу служели домашнї священїки о. Владислав Варґа, хтори и наказаовал, о. Владимир Медєши, о. Михайло Шанта, споведал о. Ярослав Варґа, а на Служби шпивал Александар Планкош зоз шестрами Служебнїцами и вирнима.
У казанї о. Владислав Варґа потолковал значенє швета кед ше Исус преображел пред трома апостолами на гори Тавор и цо воно представя нєшкайшим вирним у їх каждодньовим християнским живоце. Подїя кед ше на гори Тавор у присустве апостолох Петра, Йоана и Якова и пророкох Мойсея и Илиї Господ Исус Христос преображел, кед му шмати и твар заблїсли зоз шветлосцу.
То швето кед треба роздумовац и припознац свойо гришки же би нам Господ пребачел, а ми ше преображели, и ишли по Христовей драги тримаюци ше Божих заповидох.
На концу Богослуженя пошвецена овоц хтору принєсли вирни, а за тих цо нє принєсли, овоц обезпечел Церковни одбор.
