НОВИ САД – На нєдзелю, 5. марца, у „Студию М” Радио-телевизиї Войводини (РТВ) будзе 27. Фестивал рускей народней шпиванки „Ружова заградка”. На Фестивалє буду виведзени 14 нови композициї у народним духу.
Виводзачох, медзи котрима того року и Хлопска шпивацка ґрупа РКЦ з Нового Саду, а по длугшей павзи и Звонимир Кочиш, буду провадзиц Вельки народни оркестер РТВ, под руководительством Мичу Янковича и Студийна вокална ґрупа. У змагательней часци Фестивалу наступя углавним младши шпиваче, а у ревиялней старши.
Пред початком Фестивалу, на 19,30 годзин у (долнїм) голу „Студия М” орґанизована вистава малюнкох Андєлки Античевич з Беркасова, з назву „Квеце”, хтору отвори Ирина Гарди Ковачевич.
Музично-змагательна часц „Ружовей заградки” почнє на 20 годзин, а и того року фахови жири наградзи три найлєпши композициї, найлєпши текст, интерпретацию и аранжман. Тиж будзе вибрана и найлєпша шпиванка по думаню публики у сали „Студия М”. У жирию Александар Дуїн, Агнета Маслар, Марийка Холошняй, Мирко Преґун и Ирина Гарди Ковачевич.
У ревиялней часци будзе представена творчосц Дюру Латяка, чийо тексти уж 27 роки нєзаобиходна часц композицийох хтори на репертоаре „Ружовей заградки”.
Як кажди рок‚ директни пренос Фестивалу годно провадзиц на Другей програми РТВ и Трецей програм Радия РТВ, односно на 92,100 МHz, а тиж и на интернету – прейґ опциї „Програма на живо”, дзе ше потим вибере ТВ (опция ТВ2), лєбо Радио (опция РНС3).
Орґанизатор и ґенерални покровитель Фестивалу Радио-телевизия Войводини, а и того року будзе обявени промотивни компакт-диск з композициями з 27. „Ружовей заградки”.