ШИД – На соботу, 2. септембра, у Шидзе будзе Дзешати Фестивал тамбурових оркестрох „Мелодиї Руского двору”, у орґанизациї КПД „Дюра Киш”. Програма Фестивалу будзе на отвореней сцени у Лєтнєй владическей резиденциї у Шидзе, а у случаю подлей хвилї, програма будзе отримана у просторийох Словацкого дому „Єднота” у Шидзе.
У рамикох провадзацей програми Фестивалу у Лєтнєй владическей резиденциї на 16 годзин будзе отворена вистава малюнкох з Подобовей колониї „Руски двор 2017”, а од 17 годзин у порти буду поставени етно-штанди здруженя женох.
Музична часц програми, у хторей ше буду змагац оркестри з наших дружтвох, почина на 18 годзин. Фахови жири преглаши три найлєпши оркестри, а будзе преглашени и найлєпши оркестер по думаню публики. У ревиялней часци зоз своїм репертоаром наступя домашнї – члени Културно-просвитного дружтва „Дюра Киш“.
На ютре, 1. септембра, у рамикох Фестивалу перши раз будзе Вечар за младих – Рок-концерт, на хторим наступя млади музичаре з Руского Керестура и Шиду.
Ютрейши Вечар за младих будзе у просторийох КПД „Дюра Киш” у Шидзе, почина 20 годзин, а уход шлєбодни.