НОВИ САД – Новосадски полумаратон, 24. по шоре, будзе отримани на ютре, 1. априла, а старт на Площи шлєбоди на 10 годзин. На тогорочним Полумаратону орґанизаторе обчекую вецей як тисяч змагательох и змагательки.
Предсидатель Скупштини Городу Нови Сад Здравко Єлушич поволал Новосадянох же би ше придружели обеговачом и участвовали на Полумаратону, а новосадских вожачох замодлєл най маю порозуменя и сцерпеня пре отримованє обегованьох, бо дзепоєдни улїци буду заварти.
Новосадски полумаратон ма сертификат и лиценцу шветових полумаратонских обегованьох, а промотер тогорочного наш преславени спортиста и освойовач златней медалї на Олимпияди у Рию Давор Штефанек. Лимит за отримованє обегованьох три годзини, та тельо улїци буду заварти.
Попри полумаратонского обегованя, на ютре будзе и штафетни полумаратон, фертальмаратон, гуманитарне обегованє, бежанє-шпацир штредньошколцох и старших особох, преходзка дзецох, як и традицийне обегованє бебох у рачкованю.