На ютре на керестурским теметове здогадованє на Юлияна Рамача Чаму

автор зам
1.2k Опатрене

РУСКИ КЕРЕСТУР – На ютре, 24. юния, будзе рок як нас нєсподзивано занавше зохабел єден з наших найвизначнєйших музичарох, композиторох, аранжерох, дириґентох и музичних фаховцох Юлиян Рамач Чамо. Умар 24. юния вноци 2016. року, а поховани є ютредзень, 25. юния на керестурским теметове.

Юлиян Рамач народзени 21. децембра 1963. року у Руским Керестуре, а после музичного школованя, як абсолутни слухиста грал на клавиятурох и гармоники, на шицких тамбурових инструментох, на дуйних, нє були му страни анї смиково инструменти и за свойо нєполни 53. роки живота зохабел за собу вельке музичне дїло и фахову роботу, з чим спада ґу велїканом рускей музики.

Як музични сотруднїк у Доме култури Руски Керестур робел од новембра 1986. року и як на вецей заводи констатованє после його нєсподзиваного упокоєня, скоро цалосна музична дїялносц Дому култури остатнї децениї була на Чамових плєцох. Руководзел з оркестрами, шпивацкима ґрупами дзецох, младих и старших, соло-шпивачами, писал аранжамани за шпиванки и танци, дириґовал з хором, бул корепетитор, композитор…

Попри тим, остатнї даскельо децениї бул водзаца особа у музичним живоце Руснацох на тих просторох, насампредз як фахови музични руководитель котри свойо знанє преношел музичаром и шпивачом у скоро шицких наших КУД-ох, а окреме допринєсол нашим музичним фестивалом – „Червеней ружи” и „Ружовей заградки”, з хторима вєдно роснул як композитор, аранжер, дириґент и фахови руководитель.

Юлиян Рамач Чамо компоновал коло 40 нови руски шпиванки у народним духу, коло 15 у забавним и коло 45 за дзеци, за нїм числени аранжмани, авторска музика за театрални представи, коло 50 сонґи за представи, компоновал и за тераз єдину нашу оперету, сотрудзовал з нашима редакциями радия и ТВ, з кулску музичну школу, дириґовал и з Националним оркестром Руснацох, писал за ньго аранжмани… И шицко цо робел, робел з дзеку, вредно, даваюци цалого себе, нєшпоруюци ше.

На ютре, 24. юния, на рок од упокоєня Юлияна Рамача Чаму, його фамелия, Дом култури и його члени, алє и шицки почитователє Чамовей роботи и подоби, на 18 годзин коло його гроба на керестурским теметове з Панахиду ище раз даю почесц нашому велькому Чамови.

ПОВЯЗАНИ ТЕКСТИ