На ютре тродньове швето Сошествиє св. Духа – Русадля

автор маф
820 Опатрене

РУСКИ КЕРЕСТУР – У парохиї св. оца Миколая по григориянским календаре ютре почина преславйованє тродньового швета Сошествиє св. Духа – Русадля На треци дзень швета традицийни Завитни дзень у Водици. Того дня там будзе шветочно означена и 15-рочнїца снованя нашого Апостолского еґзархату.

На ютре у Катедралней церкви Служби Божо буду на 8, велька на 10 годзин, дзецинска на 11,30 и вечарша на 19 годзин. На други дзень швета Служби у церкви на 8 и 10 годзин и мированє. а вечарша будзе лєм у Водици на 19 годзин на предвечериє Завитного дня. Пред тим на 17 годзин з церковней порти до Водици руши процесия.

На треци дзень будзе Завитни дзень у Водици а источашнє будзе означена и 15-рочнїца Еґзархату на Архиєрейскей Служби Божей на 11 годзин, хтору будзе предводзиц наш владика кир Георгий Джуджар з високима госцами, од апостолского нунция по велїх владикох, священїкох, и вирних, а обчекує ше приход и парохиянох з других наших парохийох.

Швето Русадля символизує желєна фарба, та священїки маю желєни ризи, у церкви тиж желєни прикраски, а зоз желєнима конарами ше оквецує и церква и обисца вирних, та ше желєни конарки кладу на капуру и облаки, як символ зиходзеня св. Духа.

ПОВЯЗАНИ ТЕКСТИ