НОВИ САД – Академия уметносцох акредитовала нову студентску програму – дворочни мастер студиї Конзервация и реставрация дїлох подобовей и применєней уметносци. Перши студенти на тоту нову програму ше годни уписац у академским 2017/18. року.
– Циль програми формовац фахових конзерваторох-реставраторох дїлох подобовей и применєней уметносци котри розумя историю, теорию и филозофию защити културного скарбу, маю комбиновани знаня з рижних уматносцох, дружтвено-гуманистичних наукох и природних наукох и технолоґиї. Ґу тому, буду оспособени плановац и вивесц конзерваторско-реставраторски третман, сотрудзовац з фаховцами з других обласцох и мац критичну свидомосц о процесох защити и презентациї културного скарбу и улоги конзерватора-реставратора у нїх – гварела шефица Департману подобових уметносцох Академиї уметносцох професорка Босилька Зироєвич Лечич.
После студийох кандидати годни робиц самостойно, у сотруднїцтве з институциями култури и защити културного скарбу, у музейох, ґалерийох, заводох за защиту памятнїкох култури, вирских орґанизацийох и других институцийох, компанийох, лєбо поєдинцами.
За академски 2017/18. рок тота студентска програма будзе мац пейц буджетски и пейц самофинансуюци места, а право конкуровац маю шицки котри закончели основни академски студиї на уметнїцких и подобних факултетох, дзе здобули по шейсц боди з предметох „История уметносци” и „Рисованє”, а други кандидати муша покладац диференцийни испити.