НОВИ САД – Пияток, 13. Октобра, покраїнски секретар за польопривреду, водопривреду и лєсарство мр Вук Радоєвич додзелєл 149 нови контракти войводянским парастом за инвестициї вкупней вредносци 270 милиони динари, а з учасцу Секретарияту скоро 149 милиони динари.
Мр Радоєвич виявел же з подписованьом тих контрактох, по основи трох конкурсох, з котрих єден за купованє опреми за залївни системи, за цо подписани 53 контракти. Цалосна инвестиция до опреми за залївни системи виноши коло 80 милиони динари, з учасцу Секретарияту од 42 милиони динари, дзекуюци чому нови 365 гектари обрабяцих поверхносцох буду под залївну систему. Радоєвич наглашел же з двома конкурсами за инвестованє до залївних системох, потераз подписани 775 контракти, вредносци 675 милиони динари, з учасцу Секретарияту скоро 389 милиони динари.
– З тогорочнима инвестициями обезпечени залївни системи за 4 500 гектари по цалей Войводини – гварел мр Радоєвич, та додал же аґрарни буджет у 2017. року вельо векши у одношеню на 2016. рок.
Подписани и 79 контракти за софинансованє купованя опреми за защиту од нєпогодох и елементох потребних за нови овоцнїки и винїци, цалосей вредносци 151 милион динари, з учасцу Секретарияту з 87 милиони динари. За тото потераз видвоєни коло 283 милиони динари, а вєдно инвестовани 492 милиони динари. Значне же Секретарият першираз софинансує и „анти фрост“ системи за защииту од мразу, купованє слупох и дроту за ограду.
Радоєвич наглашел и значносц софинансованя инвестицийох за преробок овоци, желєняви и грозна, а першираз и продукцию винох и моцних алкоголних напойох на териториї АП Войводини, за цо подписани 17 контракти вредносци 38,5 милиони динари, з учасцу Секретарияту з 20 милиони динари. Од початку рока по тим конкурсу подписани вєдно 30 контракти вредносци 70 милиони динари, з учасцу Секретарияту 36 милиони динари.
На конкурсох Покраїнского секретарияту за польопривреду, водопривреду и лєсарство окреме препознати польопривреднїки младши од 40 рокох, жени ношителє польопривредних ґаздовствох и шицки парасти котри робя у очежаних условийох. За спомнути катеґориї субвенциї виноша и до 70 одсто вредносци инвестициї.