Вельки матуранти концом мая закончую штреднї школи, и пририхтую ше за примаци испити за дальше школованє. Нови Сад понука дзешец державни факултети. На Универзитету у Новим Садзе студираю коло 50 000 студенти, на вецей як 300 акредитованих студийних напрямох. Дацо о условийох школованя можеце пречитац у шлїдуюцих виреченьох.
ФИЛОЗОФСКИ ФАКУЛТЕТ
Филозофски факултет ма основи акедемски студиї, мастер академски студиї, и докторски академски студиї. На основних академских студийох єст осемнац рижни напрями, а медзи нїма и Катедра за Руски язик и литературу. Ребека Планчак зоз Руского Керестура студентка Филозофского факултету, на напряму Психолоґиї.
– Преподаваня ше углавном состоя зоз професорового викладаня теориї през рижни приклади и илустациї так же би студенти могли цо вецей зрозумиц. А вежби – применююци лєбо демонструюци того, цо ше тот дзень бешедовало на преподаваню – толкує Ребека.
На першим року психолоґиї ше вельо пише науково роботи, семинарски роботи котри уча як треба же би ше професийно виражовало, як треба роздумовац и арґументовац свойо думаня и подобне.
ФАКУЛТЕТ СПОРТА И ФИЗИЧНОГО ВОСПИТАНЯ
Деян Будински зоз Руского Керестура студент Факултета спорта и физичного воспитаня на напряме за дипломираного професора физичного воспитаня. Попри того напряму, ище ше понука напрями за тренерох у фодбалу, менаджерох у спорту, нутриционистох итд.
– Половка предметох нам составена зоз преподаваньох и учиме теорийни бок спорта, педаґоґию, анатомию и подобне, а другу половку настави маме вежби. Професоре на моїм факултету, а верим же и на других, то особи хтори ше цали живот занїмаю за тоту обласц и маю вельо роки искуства у своєй роботи и наисце ю добре робя – гвари Деян. Факултет спорту и физичного воспитаня часто орґанизує нащивйованє векших змаганьох котри ше отримую у Новим Садзе, помага у орґанизациї Новосадского маратону и велїм рижним збуваньом дзе студенти можу участвовац.
ТЕХНОЛОҐИЙНИ ФАКУЛТЕТ
Настава на факултету конципована прейґ авдиторних преподаваньох, лабораторийних и компютерских вежбох, а тиж, студенти маю и обовязну фахову праксу, хтору муша одробиц у индустриї. На напряме Контрола квалитету ше нашла и Андреа Рац зоз Руского Керестура. Вона толкує же попри єй напряму єст ище дзевец подобни.
– Єст два студентски орґанизациї на нашим факултету, а то Студентска уния Технолоґийного факултету, и Студентска орґанизация Технолоґийного факултету. Два роки сом була уключена до СУТФ и участвовала сом у орґанизациї рижних бавискох, друженьох, а єдно зоз найвекших збуваньох то „Медзинародне стретнуце студентох технолоґиї (МССT)”, хтори ше отримує каждого року, а учашнїки студенти Технолоґийних факултетох зоз Сербиї и зоз сушедних державох – гвари Андреа.
На тим факултету, як Андреа гвари, студент нє сконцентровани лєм на єдну файту науки, прето же тот факултет то комбинациї вецей природних наукох, як цо то хемия, математика, физика, биолоґия.
ПРИРОДНО-МАТЕМАТИЧНИ ФАКУЛТЕТ
На ПМФ-у акредитовани 49 студийни програми зоз обласци биолоґиї, еколоґиї, хемиї, биохемиї, защити животного штредку, физики, астрономиї, ґеоґрафиї, туризма, готелиєрства, математики и информатики. Нєшка на тим факултету студираю коло 6 000 студенти, а наставу викладаю коло 400 професоре и сотруднїки. Марина Сеґеди зоз Дюрдьова студентка другого року на напряме Готелиєрство, а тот напрям ше находзи на Департману за ґеоґрафию, туризем и готелиєрство.
– На факултету маме барз вельо пракси. Каждого року мушиме одробиц пририхтуюцу праксу котра тирва седем днї и вец ище мушиме одробиц ище єдну праксу хтора тирва два мешаци – толкує Марина.
Преподаваня углавним порихтани прейґ рижних презентацийох, а на тим напряме студенти ридко маю ґрупни роботнї, лєбо проєкти.
АКАДЕМИЯ УМЕТНОСЦОХ
Академия у Новим Садзе основана 1974. року и розвила ше до єдней од важнєйших уметнїцких институцийох у реґиону, базована є на комбинациї уметнїцкей, образовней и науковей пракси. На Академиї уметносцох пренашла ше и Олеся Балач зоз Нового Саду, на музичним департману, напрям Смиково инструменти. Попри того напряму, академия ма и драмски и подобови департман.
– Маме одличне сотруднїцтво зоз професорами, шицки професоре нам тримаю индивидуални преподаваня.
Же би ше достало роботу после студийох, треба вельо до себе уложиц – труду, ходзиц на змаганя и семинари, хтори, углавним, тримаю професоре зоз иножемства, треба участвовац на концертох и буц активни студент. Академию бим препоручела каждому хто люби грац, хто вредни и каждому хто вообще люби уметносц, бо то по моїм думаню єдна з найкрасших професийох – гвари Олеся.
МЕДИЦИНСКИ ФАКУЛТЕТ
Медицински факултет у Новим Садзе ше находзи блїзко при Клинїчному центру, цо студентом оможлївює квалитетну наставу и здобуванє искуства. Студентом ше дава нагоду ришовац конкретни проблеми, же би здобули потребни знаня о хоротох и способе лїченя. Студентка Медицинского факултету, Єлена Кухар зоз Нового Саду, перши рок на напряме Медицинска регабилитация.
– Тот напрям бим препоручела школяром штреднєй медицинскей школи и ґимназиї, бо школяре з медицинскей школи досц упознати зоз материю, а у ґимназиї ше здобува найширше знанє. Найвецей ше у тим пренайду особи хтори любя роботу з людзми, а як найважнєйше од шицкого, потребна велька мотивованосц за полєпшанє здравя, хтора ше пренєше на пациєнта, бо то у векшини случайох ключ успиху – толкує Єлена.
ПРАВНИ ФАКУЛТЕТ
На правним факултету, наставна и науково-виглєдовацка робота ше одвива през дзевец катедри. Барбара Колошняї зоз Руского Керестура студентка Правного факултету на общим напряме. Вона гвари же студенти часто орґанизую гуманитарни змаганя у рижних спортох, а приход з того идзе тим, котрим то потребне.
– Правни факултет вимага вельо ученя, витирвалосци и вельо одреканя же би ше посцигло позитивни резултати. Препоручела бим го стредньошколцом хтори любя право, правду и закони – заключує Барбара.
ФАКУЛТЕТ ТЕХНЇЧНИХ НАУКОХ
По числу студентох, ФТН найвекши факултет у составе Универзитетох у Новим Садзе. На 13 департманох, тот факултет реализує 88 студийни програми. Єден зоз найцикавших програмох то Електротехнїка и рахункарство, хтори ма седем модули (напрями).
Маю добре розвити и студентски униї, а ССФТН (Союз студентох Факултета технїчних наукох) зоз своїма роботнями, презентациями и рижнима проєктами уж вецей як 40 роки помага студентом ФТН-а. Студент ФТН-а и Иґор Раґаї зоз Дюрдьова, хтора свойо знанє усовершує на напряме Мехатронїки.
– Професоре на першим месце добри и щири людзе хторим циль же би студентом пренєсли цо вецей знаня и направели зоз нїх високо образованих фаховцох познатих ширцом швета – припознава Иґор и додава же сам факултет на концу студийох нє обезпечує роботу, алє попри здобутого знаня, а поготов напряму Мехатронїка, котри мултидисциплинарна инжинєрска дисциплина и йому подобних напрямох, маю досц вельки вибор роботох и нє муша ше старац чи ю достаню.
ЕКОНОМСКИ ФАКУЛТЕТ
На Економским факултету у Новим Садзе студира Дорика Чизмар зоз Руского Керстура.
– На тим факултету ше барз вельо практикує комуникованє прейґ интернета. Професоре по тим питаню ажурни, и вше, у найкратшим року, одвитую на мейл – гвари Чизмарова.
Дорика толкує же єст пракси котри ше муша одробиц прето же ше зоз нїх доставаю боди и оцени. А тиж постоя и пракси на хтори ше идзе прейґ даяких екскурзийох, як и пракси у иножемстве.
– Барз часто и скоро з каждого предмету ше робя семинарски роботи, у ґрупох. Вельку предносц маю тоти школяре котри скорей того закончели Економску штредню школу, прето же уж маю даяку основу, и наисце чувствую олєгчанє – припознава Дорика.
ПОЛЬОПРИВРЕДНИ ФАКУЛТЕТ
Борис Рац зоз Дюрдьова студира на Польопривредним факултету у Новим Садзе.
На тим факултету єст штернац напрями, медзи хторима и статкарство, фитомедицина, ветеринарска медицина, овоцарство и винїцарство, итд.
– Професоре на Польопривредним факултету коректни, и вше сцу помогнуц. На факултету єст обовязни пракси дзе студенти применюю свойо знанє и усовершую го. Часто маме зоз даєдних предметох и семинарски роботи котри углавним робиме по пари – гвари Борис.