РУСКИ КЕРЕСТУР – Коло долїни опрез теметова у Руским Керестуре настал проблем зоз шмецом, понеже го там почали виношиц за тераз нєпознати особи.
Совит Месней заєднїци (МЗ) Руски Керестур ище скорей одлучел же тоту долїну треба завесц, алє лєм зоз глїну и другим будовательним одпадом, а нїяк з комуналним шмецом.
– Одлука принєшена пред двома роками и предвидзує завоженє долїни, алє нє и вивоженє там нєадекватного шмеца, хторому место на депонийох. Дотераз, кед ше з бокох направело громаду, порозгартана є з баґерами нука до долїни – гвари за Рутенпрес секретар МЗ Руски Керестур Михайло Сабадош.
По приношеню спомнутей одлуки опрез долїни стали табли з надписом же ту забранєне руцац комуналне шмеце и же долїну мож завожиц лєм з будовательним одпадом и глїну.
– ЯКП „Руском” повола инспектора, котри найвироятнєйше нєшка видзе на терен, алє кед ше нє пренайдзе виновнїкох за руцанє того нєадекватного шмеца опрез теметова, крем налогу за розчисцованє одпаду, вироятно друге нїч нє годно зробиц – гварел директор ЯКП „Руском” Иґор Фейди, додаваюци же тото подприємство у Керестуре орґанизовано поряднє збера комуналне шмеца опрез шицких обисцох.