РЕҐИОН – Млади котри одходза зоз Сербиї, Босней и Герцеґовини, Горватскей и Чарней Гори порихтани ше врациц до своєй держави лєм кед буду мац векши можлївосци за доставанє роботи и за вибудов кариєри, указало онлайн-виглєдованє Институту за розвой младих КУЛТ.
У виглєдованю участвовали 720 млади особи од 15 до 35 роки з БиГ, Сербиї, Чарней Гори и Горватскей, котри ше за остатнї три роки виселєли до иножемства, лєбо су у процесу висельованя, пренєсла сараєвска Н1 телевизия.
По резултатох анкети, найвекше число младих з нашого реґиону ше виселєло до Нємецкей, потим до Австриї, Шведскей, Словениї, Велькей Британиї, Ирскей, Французкей, Шпаниї, Голандиї и Ческей.
Вецей як 50 одсто младих одходза самостойно, коло 30 одсто з помоцу родзини и приятельох, а лєм коло 10 одсто прейґ аґенцийох за поштредованє у доставаню роботи.
Коло 80 одсто младих нє видза лєпшу будучносц у своєй жеми, а як причини за тото наводза нєзадовольство з политичним станом, корупцию, нєзанятосц, проблеми вязани за национални, вирски и войново питаня, та нєзадовольство з роботнима местами и приманями.
У державох до хторих одходза млади обчекую лєпшу образовну и здравствену систему, лєпши животни амбиєнт, векшу можлївосц за доставанє роботи и векшу сиґурносц.
Вецей як 30 одсто випитаних младих ше нє планує врациц до своєй держави, а други лєм под условийом же им будзе обезпечена можлївосц за квалитетнєйши живот.
На питанє чи ше виселюю фамелийно, скоро 60 одсто дали позитивни одвит, коло 20 одсто одвитовали же ше за виселєнє пририхтую и їх фамелиї, а лєм 10 одсто одвитовали неґативно.