РУСКИ КЕРЕСТУР – У Школи „Петро Кузмяк” у Руским Керестуре ше нєшка, 27. мая, отримує Републичне змаганє з руского язика и язичней култури за школярох основних школох, хторе орґанизую Министерство просвити, науки и технолоґийного розвою, Дружтво за руски язик, литературу и културу, а того року и Основна и штредня школа з домом школярох „Петро Кузмяк”, як домашня Змаганю.
На Републичним змаганю участвую осмеро школяре седмей и осмей класи з ОШ у Руским Керестуре и Коцуре дзе настава руского язика порядна и дзевецеро школяре седмей и осмей класи ОШ з Нового Саду, Ветернику, Нового Орахова, Бачкей Тополї, Вербасу, Кули и Бачинцох/Шиду, дзе ше руски язик виучує як виборни предмет.
Школяре пласман на Републичне змаганє виборели после участвованя на Медзиокружним, хторе тиж отримане у Руским Керестуре.
Отверанє Републичного змаганя з руского язика и язичней култури на 9,30 годзин, ришованє тестох од 10 до 11,30 г., а преглашованє резултатох од 14,30 до 15 годзин.