СЕРБИЯ – Нєшка, 22. септембра на вечар, на 22,02 годзин у нас почина єшень, а за жительох южней Жемовей полулабди почина яр, сообщело Астрономске дружтво „Рудєр Бошкович” з Беоґраду.
На дзень початку єшенї слунко видзе на 6,25 годзин, а зайдзе на 18,37 годзин, так же дзень будзе тирвац 12 годзини и 11 минути, а ноц 11 годзини и 49 минути. На дзень єшеньскей ровнодньовнїци дзень и ноц нє єднаки, бо Жем, пре атмосферу, привидно воздвигує Слунко понад горизонт.
Як гваря метереолоґи, обчекує нас цепла и приємна єшень, зоз штредню максималну температуру од 17 до 20 ступнї у нїзших предїлох, а штредня минимална температура будзе од 6 до 10 ступнї Целзиюса.
Тей єшенї мож обчековац од 4 до 14 жимни днї з мразом, як и же спаднє просекове количество паданьох, єдино у новембру буду понад просеку.
Октобер будзе штреднє цепли и влажни, з михаловим лєтом и температуру од коло 19 ступнї.
Жимске рахованє часу у Сербиї почнє о мешац, остатнї викенд у октобру.
