Одлука о вирабяню Плану детальней реґулациї Водици

автор зам
907 Опатрене

КУЛА/РУСКИ КЕРЕСТУР – Скупштина општини (СО) Кула вчера, 28. фебруара, на своєй порядней схадзки принєсла одлуку о вирабяню Плану детальней реґулациї локалитету „Водица” у катастерскей општини Руски Керестур, як локациї за вирски туризем.

Ношитель вирабяня Плану Општина Кула, хтора го будзе и финансовац. План оброби ЯКП „Комуналєц” з Кули, а мал би буц закончени о три мешаци од дня доставаню Звиту о оконченим явним увиду.

Слово о проєкту у хторим рускокерестурска грекокатолїцка парохия партнер грекокатолїцким парохийом зоз Сеґидину и Кечкемету у Мадярскей, а по хторим би у Водици мал буц збудовани обєкт за змесценє нащивительох, як вирнїкох, так и других. Як пише у толкованю – будуци обєкт за вирски туризем оможлїви преширенє гуманитарних и дружтвених активносцох на преношеню вири и очуваню традициї.

Вязано за Руски Керестур, СО Кула вчера принєсла и Одлуку „о оцудзеню” обєкту хтори ше службено вола „Будинок драгового транспорту”, а роби ше о чекальнї на автобускей станїци, дзе источашнє и погосцительни обєкт „Бомбай”.

Понеже обєкт у явней, односно у власносци Општини Кула (пред тим власнїк була Месна заєднїца), Општина го дала на лицитованє. Тарґовищну вредносц нєрухомосци оценєла Филияла Порцийней управи Кула, так же початна цена була дацо вецей як 14 тисячи еври, а на лицитованю найвигоднєйше понукнуце за купованє дал привреднїк Славко Бучко (тарґовини „Фреш маркет”) з Руского Керестура. После потребних правних роботох, обєкт з явней будзе уписани до приватней власносци.

СО Кула вчера принєсла и Одлуку о Плану детальней реґулациї системи за наводньованє „Сивец-Сивер”, на поверхносци од коло 2 600 гектари у катастерскей општини Сивец, за жем хтору тераз хаснує „Ал рафавед Сербия”.

Тиж одредзени и простори на хторих у кулскей општини и єй местох нє дошлєбодзене явне сходзенє, а углавним то опрез образовних и здравствених установох, як и опрез обєктох значних за одбрану и безпечносц.

ПОВЯЗАНИ ТЕКСТИ